پشتون کلچر ڈے آ پشتون قوم ءِ مبارکبادی پیش کینہ، حاجی نصیر لہڑی

کوئٹہ، قبائلی راہشون حاجی نصیر لہڑی پشتون کلچر ڈے انا وخت آ پشتون قوم ءِ است انا ہُب اٹ مبارکبادی ترسا پارینے کہ پشتون ربیدہ تینا متکن آروایت، شانی آ اقدار‘ مہمان نوازی، ایلمی‘ بہادری نا سوب آن اسہ جتا ءُ ہند اس تخک۔ تینا مبارک بادی نا کلہو اٹی او پارے کہ پشتون کلچر ڈے تینا ربیدہ، روایت و تاریخی میراث ءِ پاش کننگ نا اہم ءُ وارخواہی اسے‘ پشتون قوم مدام تینا روایت، اقدار و ربیدگی میراث ءِ زندہ تخانے و پوسکن آ چین ءِ تینا تہذیب و ربیدہ غان درستی راستی کرفنگ اٹی اہم کڑد ادا کرینے، حاجی نصیر لہڑی پارے کہ پشتون راج انا بنداوی اقدار آتیٹی امن، ایلمی، شرف، مہمان نوازی اوار ءِ‘ ہرافتے شون تننگ آن راج اٹی تین پہ تینی ہم آہنگی و سیوت ءِ پین جوڑ کننگ کیک۔ او پارے کہ بلوچستان جتا جتا قوم‘ بولی و ربیدہ نا ہند ءِ و کل قوم تا دود وربیدہ صوبہ نا تاریخی و تہذیبی زیبائی ٹی ودکی کیرہ۔