عزم ردالفتنہ 3 ،مستونگ اٹی سیکورٹی فورس آتا آپریشن‘9خوارج خلنگار

مستونگ، بلوچستان اٹی دہشت گرد آتا پورو چٹفنگ کن برجا عزم ردالفتنہ 3 نا رد اٹ سیکورٹی فورس آک مستونگ نا علاقہ کانک دامان اٹ کارروائی کرسا فتنہ الخوارج نا 9 دہشت گرد ءِ خلکر۔ دہشت گرد آک سیکورٹی فورس آتا چوکی آ جلہو کننگ نا بے سہب کوشست کریر ہرادے ورناک وخت آ و بھرمی ورندی کارروائی اٹ بے سہب کریر۔ فتنہ الخوارج نا دہشت گرد آک کانک دامان اٹ سیکورٹی فورس آتا چوکی آ جلہو کریر، ہراڑا ورناک دمدستی ورندی کارروائی کرسا جاگہ غا 2 دہشت گرد ءِ خلکر۔ سیکورٹی فورس آک نروک دہشت گرد آتے ایب کیب انا علاقہ غاتے تد تمار‘ وہڑتوم آ کنڈآن سم کاری اٹ پین 7 خوارج ءِ ہم خلکر۔ خلنگوک دہشت گرد آتیان 3 موٹرسائیکل تون اوار بھلو کچ اسے ٹی سلہہ و منچر دوئی مسنے‘۔ دا وخت آ ہڑتوم آ کنڈآن مروک بھلا سم کاری اٹ سیکورٹی فورس آتا اسہ ورنا اس ہم ٹھپی مس‘ ہرادے دمدستی وڑ اٹ ہسپتال آ گدریفنگا۔ سیکورٹی حوالی پیدوار کرینے کہ ریاست نا رٹ ءِ چیلنج کروک و بلوچستان آن گڈیکو دہشت گرد نا چٹفنگ اسکان دا کارروائیک پورو وڑ اٹ برجا سلرہ۔ بنجائی وزیر داخلہ محسن نقوی آپریشن ردالفتنہ 3 نا رد اٹ فتنہ الہندوستان نا دہشت گرد آتا برخلاف بلوچستان اٹی سرسہب آپریشن تیا سیکورٹی فورسز آتا ستا ءِ کرسا مستونگ نا علاقہ کانک دامان اٹ 9 دہشت گرد ءِ جہنمی کننگ آ سیکورٹی فورس آتا کسبی لائخی تا ستاءِ کرینے وپارے کہ دہشت گرد آتا پراگندہ ارادہ غاتے بے سہب کروک سیکورٹی فورس آتا ز بہادر آ ورناتیا گمر کینہ‘۔ محسن نقوی اسہ بیان اسے ٹی پارے کہ سیکورٹی فورس آتا کارروائیک قومی سلامتی نا رکھ انا ارادگی نا ڈیک ءُ۔ آپریشن ردالفتنہ 3 ٹی بشخ ہلوک وطن نا بہادر ورناتے خراجِ تحسین پیش کینہ۔ قوم دہشت گردی نا برخلاف جنگ اٹی سیکورٹی فورس آتتون اوار سلوک ءِ۔ فتنہ الہندوستان و فتنہ الخوارج نا برخلاف آپریشن پورو واک اٹ برجا سلک۔