فیلڈ مارشل، ای و مچ آ پاکستانی قوم دا نازرک انگا وخت اٹ سعودی تون تفوک اُن ، وزیراعظم شہباز شریف

وزیراعظم شہباز شریف سعودی آئل ٹینکر آتیا حوثی ملیشیا نا جلہو آتا سخت انگا لوز آتیٹی مذمت ءِ کرسا پارینے کہ فیلڈ مارشل، ای و مچ آ پاکستانی قوم دا نازرک انگا وخت اٹ سعودی سرکڑدہ، ایلم الس تون سوگو عزم اٹ تفوک اُن۔ پاکستان امن وسلامتی و سوگی کن مملکت و جہانی برادری تون کمک ءِ برجا تخک، پاکستان بحیرہ احمر، ہرمز تنک و سمندری واپار نا بے سلنگ روانی کن خڑک کمکاری ءِ برجاتخک۔ سرجم حوال آتا رد اٹ وزیراعظم محمد شہباز شریف سعودی عرب نا ولی عہد شہزادہ محمد بن سلمان ءِ باور کرفینے کہ پاکستان امن، سلامتی، سوگوی و بحیرہ احمر، ہرمز تنک و گیشتر ڈیہہ اٹی کانودی سمندری واپار نا بے سلنگ آن روانی کن سعودی عرب و جہانی برادری تون خڑک کمکاری ءِ برجا تخک۔ پنچ شنبے نادے آ پی ایم آفس نا میڈیا ونگ آن جاری بیان نا رداٹ وزیراعظم محمد شہباز شریف سعودی عرب نا ولی عہد و وزیراعظم شہزادہ محمد بن سلمان بن عبدالعزیز آل سعود تون فون آ ہیت وگپ کرے۔ بھاز گچین چاگڑد اٹی مروک آ دا گپ وتران اٹی وزیراعظم بحیرہ احمر اٹی سعودی آئل ٹینکر آ حوثی ملیشیا نا لغور جلہو آتا سخت انگا لوز آتیٹی مذمت ءِ کرے۔ او پارے کہ داوڑ انا گام گیج امنا مفروک و جہانی کانود نا خلاف ورزی ءِ ۔ وزیراعظم پارے کہ دا گام جہاز رانی و واپاری نا آجوئی کن خطرہ و علاقائی امن، سلامتی و سوگوی ءِ نسخان رسیفک۔ او ایلم ملک سعودی عرب تون پاکستان نا پورو یکجہتی نا درشانی ءِ کرسا پارے کہ کنا جند، فیلڈ مارشل سید عاصم منیر و مچ آ پاکستانی قوم دا نازرک وخت اٹی سعودی سرکڑدہ و مملکت نا ایلم الس تون سوگوی و عزم اتون تفوک ءُ۔ او مملکت سعودی عرب نا سلامتی، وتواجہی ، علاقائی سالمیت و شونہالی کن پاکستان نا بدل مفروک مخ تفی نا درشانی ءِ کرے۔ وزیراعظم ولی عہد شہزادہ محمد بن سلمان ءِ باور کرفے کہ پاکستان امن، سلامتی، سوگوی ، بحیرہ احمر، ہرمز تنک و ڈیہہ اٹی کانودی سمندری واپار نا بے سلنگ آن روانی کن مملکت و جہانی برادری تون خڑک کمکاری ءِ برجا تخک۔ او خادم الحرمین الشریفین شاہ سلمان بن عبدالعزیز آل سعود کن ہم نیک است خواہی و خیرخواہی نا جوزہ غاتا درشانی ءِ کرے۔ ولی عہد شہزادہ محمد بن سلمان پاکستان نا آخبتی مخ تفی و ہڑتوم آ ملک آتا نیام اٹ خڑک ایلمی تعلقداری تا ستاءِ کرے۔