بلوچستان اٹی دہشت گردی نا پورو چٹفنگ اسکان کارروائی تے برجا تخنگک ، فیلڈ مارشل عاصم منیر

فیلڈ مارشل سید عاصم منیر جنرل ہیڈکوارٹرز (جی ایچ کیو) اٹی 20 میکو نیشنل ورکشاپ بلوچستان نا شریدار آتتون اوڑدہی کرے‘ ہراٹی بلوچستان نا سیکورٹی حالیت، قومی سیوت و شونداری گام گیج آتیا سرجم گپ وتران کننگا۔ آئی ایس پی آر نا رِد اٹ فیلڈ مارشل سید عاصم منیر پارے کہ سیکورٹی فورس، کانود نافذ کروک ادارہ و الس نا اسیجائی کوشست اٹ بلوچستان اٹی مدامگی امن ءِ پک کننگک۔ او پارے کہ فتنہ الخوارج و فتنہ الہندوستان نا برخلاف شست کروک کارروائیک پورو عزم اتون برجا سلرہ۔ وخت اس کہ دہشت گردی و اونا کمککار آتا پورو چٹفنگ اسکان آپریشن آک بے اڑاند آن برجا سلرہ۔ فیلڈ مارشل پارے کہ پاکستان و الس کن خطرہ جوڑ مروک دہشت گرد نیٹ ورک ءِ امر کہ مرے چٹفنگک۔ اوپارے کہ درملکی کاٹم خواجہی ٹیچلینگوک پراکسیک پدریسہ بلوچستان اٹی بے امنی و بے باوری تالان کننگ نا کوشست کننگ اٹی ءُ، ولے سلہہ بند فوج و پاکستانی الس نا سیوت، استقامت و عزم اٹ دشمن نا کل لغوری ارادہ غاتے بے سہب کننگک۔ او پارے کہ بلوچستان پاکستان نا گمر و قدرتی وسیلہ غاتیان شُپ ءُ صوبہ اسے، وخت اس کہ صوبہ نا محب وطن، لائخ و ثابت قدم الس اونا کل آن بھلا واکداری ءِ۔ فیلڈ مارشل سید عاصم منیر دا ہیت آ زور شاغا کہ بنجائی و صوبائی حکومت آتا شونداری ڈٹ آک بلوچستان نا راجی و زرگزرانی شونداری کن جامع سج پام نا رد اٹ برجا ءُ، ہرافتیان الس نا شونہالی و سوگوی ءِ شون رسینگک۔ او قومی سیوت نا شون اٹی سول سوسائٹی، یونیورسٹی، میڈیا و ورنا تا جوان کڑد انا ہم ستاءِ کرے و پارے کہ پاکستان نا روشنا آخبت کن قومی سیوت، استقامت و اسیجائی کوشست المی ءِ۔ دیوان نا گڈسر اٹی نیشنل ورکشاپ بلوچستان نا شریدار آک پاکستان نا سوگوی، شونداری و وتواجہی کن تینا اسیجائی ارادہ نا دوارگی ءِ کریر۔