بھارت دہشت گردی نا کاٹم خواجہ، ہزار آ بندغ آتے کسفینے ، پاکستان

پاکستان پارینے کہ بھارت دہشت گردی نا کاٹم خواجہ ءِ ہرا ہزار آ بندغ آتے کسفینے‘ سندھ طاس معاہدہ ٹی ’’معطل‘‘ کننگ نا ہچ ءُ ٹک اس اف، ہندا سوب آن بھارت نا تینا خود آن معطلی نا گام غیر کانودی ءِ۔ دا ہیت ءِ اقوام متحدہ ٹی پاکستان نا آخبتی مشن نا فرسٹ سیکرٹری انصار شاہ تدوک آ دے بھارتی سفیر ہریش پرواتھانی نا سیم انا ایپار آن دہشت گردی نا دوبہ غاتے مسترد کرسا پارے، او پارے کہ دہشت گردی نا بابت سٹی آ دوبہ غاک اصل اٹ پاکستان نا برخلاف بھارت نا دہشت گردی نا کاٹم خواجہی و مالی کمک ءِ ڈکنگ نا کوشست ءِ۔ دا ردعمل ہمووخت آ مون آ بس ہراتم داکان مست قدرتی وسیلہ غاتا نظم و نسق نا بابت سلامتی کونسل نا دیوان اٹی پاکستان نا آخبتی مندوب عاصم افتخار احمد بھارت آ سندھ طاس معاہدہ ءِ تینا خود آن و غیر کانودی وڑ اٹ معطل کرسا دیر ءِ سیاسی سلہہ نا وڑ اٹ کاریم اٹ اتنگ نا دوبہ خلکوسس۔ پاکستانی مندوب پارے کہ 1960 انا سندھ طاس معاہدہ دا وڑ انا معطلی نا موکل تفک و نئے جہانی کانود نا عمومی اصول دانا مخ تفی ءِ کیک ، دا گام آن پاکستان نا 24 کروڑ آن زیات الس نا روزگار و راجی آسودہی ءِ خطرہ مون تروک ءِ۔ او پارے کہ دُن تو دا باندات جموں و کشمیر نا متکن آجھیڑہ نا رداٹ پیش بس ہندا سوب آن داڑان علاقائی و جہانی امن و سلامتی ءِ بھلو خطرہ اس مون تننگ کیک ۔ دانا ورندی ٹی بھارتی سفیر جموں و کشمیر ءِ بھارت نا جتا مفروک بشخ مننگ نا دعویٰ کرے و پاکستان آ سیم انا ایپار آن دہشت گردی نا دوبہ خلک ہراڑا اقوام متحدہ ٹی پاکستان نا آخبتی مشن نا فرسٹ سیکرٹری انصار شاہ تینا ورندی ءِ تننگ نا تینا حق ءِ کاریم اٹ اتسا پارے کہ سندھ طاس معاہدہ ٹی ’’معطل‘‘ کننگ نا ہچ ءُ ٹک اس ساڑی اف ہندا سوب آن بھارت نا گام غیر کانودی ءِ۔ او پارے کہ ثالثی عدالت ہم دا ہیت ءِ پک کرینے کہ سندھ طاس معاہدہ پدریسہ گچین، کانودی وڑ اٹ لازم و جھیڑہ نا خیر انا میکانزم پورو وڑ اٹ نافذ العمل ءِ۔ پاکستان نا آخبتی مشن نا فرسٹ سیکرٹری پارے کہ اسیجائی قدرتی وسیلہ غاتے سیاسی زور شاغنگ کن کاریم اٹ اتنگ جہانی کانود و جہانی اصول آتا خلاف ورزی ءِ ہرا علاقائی و جہانی امن و سلامتی کن دراست خطرہ اس مننگ کیک۔ او پارے کہ تحریک طالبان پاکستان (ٹی ٹی پی)، بلوچ لبریشن آرمی (بی ایل اے) و اونا مجید بریگیڈ کون آ ٹولی تے بھارت نا پاننگوک کمک دوئی ءِ و دا ٹولیک پاکستان اٹی ہزار آ شاری، کانود نافذ کروک کارندہ ، زالبول و چناتے شست کرینو۔ او دا دوبہ ءِ ہم خلک کہ بھارت پیشن ملک قطبی امریکہ ٹی پاننگوک عدالت آن ایڑتر کارروائی تیٹی ہم اوار مسنے۔ جموں و کشمیر نا بابت انصار شاہ پارے کہ بھارت جموں و کشمیر اٹی ریاستی دہشت گردی کرسا ءِ و ہموجاگہ نا الس ءِ اقوام متحدہ نا چندی قرارداد آتیان پد ہم وتواجہی نا حق آن محروم تخنگ ءِ ۔ او پارے کہ جموں و کشمیر نئے بھارت نا بشخ اس ئس و نئے ارے، کوزہ گیر طاقت نا تینا خودآن یا کانود آن چَپ گام گیج آک دا علاقہ نا تاریخی، کانودی و جھیڑہ ئی حیثیت ءِ بدل کننگ کپسہ۔ او زور شاغا کہ بھارت اقوام متحدہ نا منشور، جہانی کانود و سلامتی کونسل نا قرارداد آتا رداٹ تینا زمواری تے پورو کے، نہ کہ او اونا خلاف ورزی یا امنا مروک راستی تیان نمن مرے۔