گاڈی آ سم کاری، سیشن جج و گن مین تے زوال، ایڈیشنل سیشن جج ٹھپی

مستونگ نا علاقہ ولی خان ٹی نادرست بندغ آک سیشن جج انا گاڈی آ سم کاری کریر۔ ڈی پی او اللہ بخش بلوچ نا رِد اٹ سم کاری آن سیشن جج عبدالحکیم کاکڑ و اونا گن مین زوال مسر، وخت اس کہ سم کاری آن ایڈیشنل سیشن جج طارق لاشاری تون اوار اِرا بندغ بھاز ٹھپی مسنو۔ ڈی پی او نا رِد اٹ سیشن جج و ایڈیشنل سیشن جج کوئٹہ غان سیشن کورٹ مستونگ آ بسرہ‘ واقعہ غان پد علاقہ نا ناکہ بندی کننگانے۔ ٹھپی و لاش تے ہسپتال آ گدریفنگانے۔ وزیراعلیٰ بلوچستان پارینے کہ سیشن جج عبدالحکیم کاکڑ آ جلہو ریاست آ جلہو ءِ‘ دہشت گرد آتے امر کہ مرے اوفتا ایسر اسکان سر کننگک۔ او پارے کہ کانود نا رکھوک آتا دتر زیان مفک، دہشت گردی نا ہر نیٹ ورک ءِ ماس کش کننگک۔ داڑان بیدس وزیراعلیٰ بلوچستان میر سرفراز بگٹی مستونگ نا علاقہ کھڈ کوچہ ٹی سیکورٹی فورس آتا سرسہب انٹیلی جنس بیسڈ کارروائی نا ستاءِ کرسا پارے کہ دہشت گردی نا برخلاف برجا جنگ اٹی دا اسہ اہم ءُ سرسہبی اسے و حکومت بلوچستان دہشت گرد و اوفتا کمک کار آتا پورو چٹفنگ اسکان تینا کارروائی تے برجا تخک۔ وزیراعلیٰ پارے کہ سیکورٹی فورس آک وخت آ و بھرمی کارروائی کرسا فتنہ الہندوستان تون تعلقدار شش دہشت گرد ءِ خلکر، وخت اس کہ اودیمن حوال آتا بنداو آ کروک آپریشن نا وخت آ کیہی دہشت گرد آتے دزگیر ہم کننگا۔ او پارے کہ دزگیر مروک بندغ آتیٹی کمککار آتون اوار نرینہ و نیاڑی خودکش بمبار ہم اوار ءُ، ہرافک دہشت گرد تنظیم نا لغوری ارادہ غاتا پاش انگا شاہدی ءِ۔ میر سرفراز بگٹی پارے کہ آپریشن نا وخت آ دہشت گرد آتا کیہی ہند آتے بھس کننگا و اوفتا ہند آتیان بھلو کچ اسے ٹی سلہہ و بارودی مواد دوئی کننگا، ہرا سیکورٹی فورس آتا کسبی لائخی و بھرمی انٹیلی جنس ءِ پیدوار کیک۔