وڈھ اٹ حالیت آتا گچینی است جمی نا سوب ءِ، وزیر اعلیٰ بلوچستان

کوئٹہ : وزیراعلیٰ بلوچستان میر عبدالقدوس بزنجو وڈھ اٹ حالیت آتا گچینی آ است جمی نا درشانی ءِ کرسا جھیڑہ ناپرامن ایسری کن چیف آف ساراوان نواب محمد اسلم خان رئیسانی‘ نوبزادہ لشکری رئیسانی و مصالحتی جرگہ ناایلو باسک آتا منت ءِ ہرفے‘ وزیراعلیٰ پارے کہ چیف آف ساراوان نواب محمد اسلم خان رئیسانی جھیڑہ ناایسری کن قبائلی راہشون اسے نا وڑ سرکڑدہ نا وڑ کڑد اس ادا کرے وخت اس کہ پڑک آک خیرخواہ تیا پت انا درشانی کرسا امن نا بحالی نا کسر ءِ ساف کریر‘ وزیراعلیٰ پارے کہ تین پہ تین نا جھیڑہ نا پرامن خیر اکن ہیت وگپ و قبائلی میڑھ تا کمک اٹ جھیڑہ غاتے ایسر کننگ ننا روایات آتا زیبائی ءِ‘ وزیراعلی اومیت درشان کرینے کہ خیرخواہ تا کوشست آتیان وڈھ انا جھیڑہ نا آخبتی ءُ ایسر اس پیش تمک‘ اومیت ارے کہ پڑک آک مستی ہم صبر و سگ آن کاریم ہلیرہ‘ وزیراعلیٰ پارے کہ ای وڈھ اتون اوار مچ آ صوبہ ٹی آخبتی امن کن دعا کیوہ‘ امن و قبائلی جھیڑہ غاتا ایسری ءِ اولیت ایتوہ۔ وزیرداخلہ بلوچستان میر ضیاء اللہ لانگو وڈھ جھیڑہ غا تینا بیان اٹ پارینے کہ ای وڈھ انا ویل آ کل قبائلی متبر‘ نواب اسلم رئیسانی، نوابزادہ حاجی لشکری رئیسانی، سرداراسلم بزنجو، مولوی قمرالدین، مولوی فیض محمد‘ صوبائی اسمبلی نا باسک یونس عزیز زہری، صوبائی اسمبلی نا باسک زابد ریکی نا منتوار اٹ ہرافک قبائلی وڑ اٹ وڈھ ویل ءِ ایسر کننگ نا کوشست کریر۔ میر ضیاء اللہ لانگو پارے کہ ای ہڑتوم آ پڑک آتا ہم منتوار اٹ ہرافک کمک کریر‘ داکان بیدس نن اومیت کینہ کہ ہڑتوم آ پڑک آک جنگ بندی آ پورو عملدرآمد کیرہ و ویل انا ایسر اسکان ہڑتوم آ پڑک آک دن ءُ گام اس ہرفپسہ ہراڑان بلوچ قوم ءِ نسخان مرے۔ یات سلے کہ وڈھ جھیڑہ نا خیرخواہی مذاکرات ناارٹمیکو راؤنڈ اٹ ہڑتوم آ پڑک آک نواب محمد اسلم رئیسانی آ پت انا درشانی کریسر و نواب اسلم رئیسانی وکداری تننگ آن پد ہڑتوم آ کنڈآن جنگ بندی نا پڑو کریسس‘ ہڑتوم آ کنڈآن مورچہ غاک مریرہ ولے کس اس سم کاری کپک۔ جے یوآئی بلوچستان نا راہشون غلام سرور موسیانی ناکماشی ٹی ٹہیفوک کمیٹی ٹی پڑک آتا اِرا ارا نمائندہ اوار مریرہ۔

(خ ن)