نابود گوندنگ نا سازشی تا بھلا ثاقب نثار ئس، شہباز شریف

فیصل آباد :  وزیراعظم شہباز شریف پارینے کہ 2018 ٹی جھرلو گچین کاری تا کمک اٹ اودیم دروشم تے سرسہب کرفنگا‘ باسک آتے جہاز آتے ٹی تولفسا بنی گالہ اتنگا و اودے پٹی بیرفنگا‘ ای بھلا بھلا افسر آتے پاریٹ کہ اینو نم عمران خان ءِ اتنگ کن دا وڑ کننگ اٹی اُرے کنا ہیت ءِ یات کیرے ہراتم عمران نیازی تینا اصل دروشم ءِ نشان تس تو نے نواز شریف فرشتہ اس لگک‘ بروک آ گچین کاری تے ٹی مسلم لیگ ن ءِ وارخواہی رسینگا تو وزیراعظم نوازشریف مریک‘ نواز شریف نابرخلاف سازشی ٹولی نا سروک ثاقب نثار ئس‘ وزیراعظم پارے کہ ہرا بندغ آک دوسَد یونٹ بجلی کاریم اٹ اتیرہ اوفتیا نہاد آتے ودفنگتنے ولے ہرافک زیات بجلی کاریم اٹ اتیر اوفتیکن نہاد آتے ودفنگانے‘ انتئے کہ آئی ایم ایف نا شڑت آتے پورو کروئی ئس‘ بروک آ حکومت مسلم لیگ (ن) نا بس تو پاکستان ءِ اونا ہند ءِ ترفنگ کن ہر وڑ انا گام گیج وکوشست کینہ و دا کچکول ءِ پرغسا اونا ٹکر تے بنی گالہ نا ایب کیب اٹ خسنہ۔وزیراعظم پارے کہ 2018 ٹی ہراتم ملکی زرگزران راکٹ آنبار بڑزا ہناکہ تو اسہ سازش اسے نا رد اٹ نوازشریف ءِ بے بنداو دوبہ غاتے ٹی گٹ کننگاو سازش اٹ مسکوہی چیف جسٹس ثاقب نثار سازشی ٹولی نا سروک ئس‘ ہرا اواری اٹ کنے و نما قائد میاں نواز شریف ءِ دروغ نا اقامہ کیس اٹ نابود گوندار۔ وزیراعظم پارے کہ پی ٹی آئی تینا دور اٹ اسہ کشت اس ہم تختو‘ تدوک آ حکومت آئی ایم ایف تون کروک معاہدہ ءِ پرغسا ننا حکومت آ باریم شاغا‘ ہرافتا ہچ ءُ وجود اس الو ہموفک مسلم لیگ ن آ دروغ نا دوبہ خلکرہ۔ اوپارے کہ اگہ ننے پنچ سال وارخواہی تننگا تو نن کل سیوتیک اواری اٹ پاکستان نا قسمت ءِ بدل کینہ و ملک ءِ شونداری وشونہالی نا کسر آ روان کینہ۔وزیراعظم محمد شہباز شریف پارے کہ مسلم لیگ ن برسراقتدار بس تو بروک آ وزیراعظم نواز شریف مریک، پنچ سال اٹی ملک انا تقدیر بدل و بھارت ءِ اقتصادی پڑاٹ 10 سال اٹی پدی اِلنہ، الس ہراسٹ ءِ مینڈیٹ ایتک اودے امنا کینہ، تدوک آ حکومت چار سال دے و نن راج اٹ زیار تالان کرے، 2018ٹی سازش نا رداٹ نواز شریف ءِ نابود کرسا شونداری نا سفر ءِ چٹفنگا۔ وزیراعظم پارے کہ فیصل آباد نا الس وونٹ انا طاقت اٹ نئے بیرہ 2018نا دھاندلی نا کمک اٹ سرسہب کرفوک آ بہروپیہ ءِ شکست فاش ترسا 2018 نا بدلہ ءِ ہلوئی ءِ بلکن بروک آ گچین کاری تیٹی مسلم لیگ ن نا اومیتدار آتے سرسہب کرفوئی ءِ۔ مولانا فضل الرحمان سیوتی حکومت نا اہم زعماء ءِ، مسلم لیگ ن تون جمعیت علماء اسلام نا تعلق ءِ مون آ ہم پورو کینہ۔ اوپارے کہ فیصل آباد ستیانہ بائی پاس 10 ارب روپئی نا ڈٹ ءِ، داڑان فیصل آباد نا الس ءِ گچین سفری آسراتی دُوبریک۔ تدوک آ حکومت چار سال اٹی اسہ ڈٹ اسے نا ہم خشت ءِ تختنے، اوچارسال ورناتا ذہن تیٹی زِیار تالان کرے، سٹی ءُ دوبہ خلسا کرے۔ فیصل آباد نا مخلوق شونداری ریکارڈ آتے خوائفے۔ اودے زوراکی اٹ اتنگا، سویلی پنجاب نا ننا مخلوق ءِ ہیلی کاپٹر آتیٹی شاغسا اوفتا کنڈآ دِکہ تننگا، آرٹی ایسءِ نن ءُ ئی نن تولفنگا۔ دھاندلی اٹ مسلم لیگ ن نا پنجاب اٹ کسر ءِ توننگا، بنجاٹی ننا سیٹ آتے دانگ اینگ کننگا۔ عمران خان دے و نن دُز و داڑیل پارساکرے۔

(آن لائن)