پاکستان اٹی گچین کاری تا پڑو بھاز جوان ءُ ہیت اسے، امریکہ

واشنگٹن :  یو ایس پرنسپل ڈپٹی اسسٹنٹ سیکرٹری آف اسٹیٹ برائے سویلی و نیامئی ایشیاء الزبتھ ہورسٹ پارینے کہ پاکستان نا زرگزرانی ویل آتا دمدستی ایسری نا ہچ ءُ گمان اس اف ولے جہانی مالیاتی فنڈ (آئی ایم ایف) تون مروک معاہدہ غا عمل کننگ آن ملک ءِ تنکی تیان کشنگ اٹ کمک رسینگ کیک۔ پاکستان اٹ گچین کاری تا پڑو جوان ءُ ہیت اسے‘ آجو‘ انصاف آ تالان‘ و پرامن گچین کاری تا اڈ تننگ نا اومیت کرینن۔ واشنگٹن اٹ ہندی پاکستانی صحافی تتون ہیت وگپ کرسا او پارے کہ نن ارینجمنٹ (اسٹینڈ بائی ارینجمنٹ) نا مخ تفی ءِ کینہ دا پاکستان ءِ دم ہلنگ نا وارخواہی فراوان کیک۔ امریکی اسٹیٹ ڈیپارٹمنٹ اٹ پاکستان بیورو نا سروک پارے کہ پاکستان بایدے آئی ایم ایف تون اواری اٹ کاریم کننگ ءِ برجا تخے‘ ایسری نا گمان ارے ولے دمدستی ایسری نا ہچ ءُ گمان اس اف‘ او امنا کرے کہ بروک آ دیک پاکستان ناا الس کن بھاز سخت مریرہ ولے اوفتے زرگزران نا گچینی کن دا تنکی نا مرحلہ غان گدرینگوئی مریک۔ اوپاکستانی تے باور کرفے کہ امریکہ وپاکستان نا نیام اٹ سوگو شریداری ارے ہرا ساڑی سیاسی حالیت آتیان زہمی مفک۔ بڑزکو امریکی عہدیدار پارے کہ ساڑی پاکستانی حکومت نا زوت گچین کاری کرفنگ نا قول امریکہ کن خوشی نا ہیت اسے وخت اس کہ پاکستان اٹ ہچ ءُ شخصیت یا جماعت اس اونا است پسند اف‘ اوپارے کہ دا فیصلہ ءِ پاکستان ناالس ءِ کروئی ءِ کہ او ہرا جماعت ءِ گچین کننگ خواہک‘ نن اسہ جماعت اسے نا برخلاف پین جماعت اسے نا مخ تفی ءِ کپنہ‘ نن پاکستان اٹ کانود نا حکمرانی و جمہوریت نا مخ تفی ءِ کینہ۔ اوپارے کہ امریکہ و پاکستان نا نیام اٹ 2022 اٹ 9 ارب ڈالر نا تین پہ تینی واپاری مس ہرا واپاری کچ امریکہ ءِ پاکستان نا کل آن بھلا واپاری پارٹنر جوڑ کیک۔ او حساب کتاب ءِ شیئر کرے ہرافتیان درشان مریک کہ امریکی کمپنیک 2022 اٹ پاکستان اٹ ہچ مف 250 ملین ڈالر نا زرکاری کریر۔ امریکی کمپنی تے ٹی اسہ لکھ 20 ہزار پاکستانی ملازم ءُ‘ امریکہ 2022 اٹ نوکاپ نا زہمی تا کمک کن 215 ملین ڈالر فراوان کرے۔

(آن لائن)