قومی اسمبلی اجلاس :میڈیا ہاﺅس آتا 50 درسد زرتس آک تننگار، شبلی فراز
اسلام آباد (اے پی پی) بنجائی وزیر حوالکاری و شینکاری سینیٹر شبلی فراز پارینے کہ مستین نا حکومت آک پی ٹی وی تون اوار قومی ادارہ غاتیٹی سیاسی بھرتی کرسا ڈبیفینو، نن غٹ قومی ادارہ غاتے اصلاحات آتا کمک اٹ شون تننگ نا خواہندار اُن، تحریک انصاف پی ٹی وی ٹی اسہ بھرتی اس ہم کتنے، ٹی وی چینل آتا مالک آتون پک مروک فارمولہ نا رداٹ اوفتا بقایہ جات نا ایلو پیسہ غاتے ہم بروک آ اسہ ہفتہ ٹی ادا کننگک۔ پنچ شنبے نادے آ قومی اسمبلی ٹی وقفہ سوج آتیٹی چوہدری محمد برجیس طاہر نا سوج انا ورندی ٹی بنجائی وزیر حوالکاری و شینکاری سینیٹر شبلی فراز پارے کہ میڈیا نا زرتس انا بابت مسہ وڑنا بل ئسر ہرافتے ٹی پیپلزپارٹی، مسلم لیگ(ن) و پی ٹی آئی نا دورانا اِراسال انا بل آتون مالک آتون گپ وتران مسنے نن آخیریکو اِراسال انا بل آتا زرتس نا فیصلہ کرے کل پیسہ غاک اسہ ارب 15 کروڑ مسرہ ہرافتیان نیمہ ءِ تننگا و ایلو پیسہ غاتے بروک آ اسہ ہفتہ ٹی ادا کننگک۔ سینیٹر شبلی فراز پارے کہ علاقائی اخبار آتے اشتہار تا فراوانی نا بابت پوسکن ءُ میکنزم اس جوڑ کننگ انگ ءِ ہرافتا سرجم آتے مون آ اتنگک۔ ناز بلوچ نا سوج انا ورندی ٹی اوپارے کہ پی ٹی وی ٹی اِرٹ، دونیم ہزار مخلوق گدرینگوک آ دور اٹی سیاسی بنداو تیا بھرتی کننگا، ایلو ادارہ غاتیٹی ہم سیاسی بھرتی کرسا اوفتے ڈبیفنگاوخت اس کہ پی ٹی آئی پی ٹی وی ٹی اسہ ہم بھرتی اس کتنے، نن بڑزکو عہدہ غاتیا بدلی کرین، نن داادارہ ءِ شون تننگ خوانہ، اوپارے کہ پی ٹی وی نا مسہ ہزار پنشنرءُ۔