السی گرج آتتون م گرنچ پالیسی اس ٹہیفنگ نا گرج ءِ، گورنر بلوچستان
کوئٹہ (اے پی پی) گورنر بلوچستان امان اللہ خان یاسین زئی پارینے کہ صوبہ بلوچستان اٹی محرومی و پسماندگی ءِ چٹفنگ کن السی گرج آتون ہم گرنچ پالیسی ٹہیفنگ، بنداوی پنجر ءِ سوگو کننگ و گچین وڑ نا حکمرانی نا بھرم آتے الس اسکان سرکننگ کن بھرمی گام گیج کننگ نا بھاز گرج ءِ، بنجا و صوبہ غاتا نیام اٹ تعلقداریک گچین اریر و جان ءِ ہلوک آ کورونا وائرس نا برخلاف ساڑی حکومت بنجائی و صوبائی کہول آ وخت آ دمدستی گام گیج کننگ نا مثبت اثرتمنگ ءِ ہرااسہ ستاکڑزوک ئُ عمل اسے۔ داخیال آتا درشانی ءِ او پنچ شنبے نادے آ گورنر ہاوس کوئٹہ ٹی بنجائی وزیر پلاننگ اینڈ ڈویلپمنٹ اسدعمر تون گپ وتران کرسا کرے۔ داوخت آ قومی اسمبلی نا ڈپٹی اسپیکر قاسم خان سوری و وزیراعظم پاکستان نا فوکل پرسن کوویڈ نائنٹین فیصل سلطان ئسک ہم ساڑی ئسر۔ اوڑدہی ٹی ملک و صوبہ نا جم امن و ایمنی نا حالیت، کورونا وائرس نا برخلاف کروک آ حکومتی گام گیج و تین پہ تینی است خواہی نا باندات آ گپ وتران کننگا۔ اوکان پد پاکستان تحریک انصاف نا مرکزی راہشون سردار خادم حسین وردگ نا کماشی ٹی پارٹی نا اسہ ڈل اس ہم گورنر بلوچستان امان اللہ خان یاسین زئی، بنجائی وزیر اسد عمر و قومی اسمبلی نا ڈپٹی اسپیکر قاسم خان سوری تون جتا اوڑدہی کریر ہراٹی صوبہ نا چندی ضلع غاتیٹی تعلیم، جان جوڑی، ساف دیر و بے روزگاری نا بابت السی ویل و مشکل آتیا شرہ کریر۔ ڈل پاکستان نا ایلو صوبہ غاتیٹی بلوچستان نا طالب علم آتیکن تعلیمی کوٹہ ءِ ودفنگ و صوبہ ٹی بیروزگاری نا چٹفنگ کن بنجانا کنڈآن بلوچستان ءِ خصوصی پیکج تننگ نا خواست ہم کرے داوخت آ بنجائی وزیر اسد عمر پارے کہ وزیراعظم پاکستان عمران خان بلوچستان نا شونداری و شونہالی ٹی خاص است خواہی ہلنگ ءِ و تینا کنڈآن ہروڑنا کمکاری نا باوری کرفے۔