بایدے ملکی فرسٹ کلاس کرکٹ اٹ درملکی کرکٹر آک گوازی کیر‘ احسان مانی

لاہور (مانیٹرنگ ڈیسک) پاکستان کرکٹ بورڈ (پی سی بی) نا چیئرمین احسان مانی ملکی فرسٹ کلاس کرکٹ اٹ درملکی کرکٹر آتے گوازی کننگ نا اُست خواہی نا درشانی ءِ کرے۔ درملکی ویب سائٹ نا اسہ پوڈکاسٹ اسے آ ہیت وگپ کرسا احسان مانی پارینے کہ پاکستان نا فرسٹ کلاس کرکٹ اٹ درملکی گوازی گرتے گوازی کننگ آ خننگ نا اُست خواہی ءِ او پی سی بی نا پُوسکن آ ڈومیسٹک اسٹرکچر اونا دا اُست خواہی نا پوروی ٹی اہم ءُُ کڑد اس ادا کیک۔ او پارینے کہ ڈومیسٹک کرکٹ نا پُوسکن آ نظام روزگار نا زیات وارخواہی ودی کننگ اٹی ءِ۔ احسان مانی پارینے کہ مسکوہی کرکٹر تے سمجھوئی مریک کہ آخبت اٹ بیرہ پی سی بی ئس ولے داسہ 6 پین ایسوسی ایشن تیٹی ہم کرکٹ نا ملازمت ودی مریک۔ اسہ سوج اسے نا ورندی ٹی چیئرمین پی سی بی واضح کرینے کہ وزیراعظم عمران خان ننا کاریم تیٹی اوار تمپک، 18 تُو ات بیرہ 3 وار وزیراعظم تون اوڑدہی کن وخت خواہس۔ پاک بھارت سیریز نا بابت او پارینے کہ سیاست ءِ گوازی آن مُر تخنگے، تاریخ نا مطالعہ ءِ کننگے تو پاکستان اسُل سیریز گوازی کننگ آن نمن متنے ویل آک ہر وخت بھارت نا کنڈآن مون آ بسنو۔