اپوزیشن جمہوری روایت آتے لتاڑ کرے، جام کمال خان

کوئٹہ (تلار حوالکار) وزیراعلیٰ بلوچستان جام کمال خان پارینے کہ اپوزیشن صوبائی اسمبلی نا دنگ اٹی ہڑدڑ کرسا جمہوری روایت و قبائلی قدر آتے لتاڑ کرینے، اوفک بایدے تینا ردینک ءِ امنا کیر۔

وزیراعلیٰ اخبار تا شونکار آتتون ہیت و گپ کرسا پارے کہ اپوزیشن نا برخلاف ایف آئی آر کانود نا رد اٹ درج کننگانے، ولے ہیت ءِ چٹفوئی ءِ، تو اپوزیشن اسمبلی ٹی برے۔ اسپیکر صوبائی اسمبلی اپوزیشن و حکومتی باسک آتیا تالان پارلیمانی کمیٹی اس جوڑ کے، کمیٹی انت کہ فیصلہ کرے حکومت اودے منک۔ او پارے کہ بجٹ دستاویز آتیٹی دا ہیت انا شاہدی ارے کہ شونداری اسکیم آتیٹی اپوزیشن نا حلقہ غاتے ہم بشخ تننگانے، اسہ سوج اسے نا ورندی ٹی وزیراعلیٰ پارے کہ گوادر و ایلو کرکی علاقہ غاتیٹی کیہی شونداری اسکیم آتیا ترندی اٹ عملدرآمد مننگ اٹی ءِ۔ خاص وڑ اٹ گوادر اٹی دیر انا ویل انا بابت او پارے کہ پسنی آن گوادر کن ہنوک پائپ لائن اِرا تُو اٹ پورو کننگک، ہراڑا 6ارب روپئی خڑچ بریک۔ او پارے کہ میرانی ڈیم آن گوادر اسکان پائپ لائن ڈٹ آ ہم کاریم ترندی اٹ برجا ءِ، او پارے کہ گوادر ءِ دیر انا فراوانی نا ویل زُو ایسر مریک۔ ہندن مسٹ و نیم ارب روپئی نا خڑچ اٹ گوادر اولڈ ٹاؤن نا بحالی نا ڈٹ اس ہم سجفنگانے۔ جانجوڑی نا بشخ انا گچینی کن بنجا غان 7ارب وخت اس کہ صوبائی کہول آ 12ارب روپئی نا پیکیج نا رد اٹ کاریم مننگ اٹی ءِ، ہندن 8 ضلع ٹی ٹیلی میڈیسن نا بنا کننگانے، 200 بیڈ آ تالان است انا ناجوڑی نا ہسپتال پورو مننگ نا خڑک آٹے۔ او پارے کہ بنجائی ڈٹ آتیا پیشرفت نا بابت باقاعدہ اسہ کمیٹی اس جوڑ کننگانے، ہرا ہر ڈٹ ڈَول نا پراگریس رپورٹ ءِ شین ترسا 30 دے اٹ جمع کرفنگ نا پابند مریک۔ دا عمل آن صوبہ ٹی برجا شونداری کاریم تا چاروکی ءِ کننگ مریک۔ صوبہ نا تاریخ اٹی اولیکو وار کوئٹہ کراچی شاہراہ ءِ دورویہ کننگ کن ڈٹ بنجائی پی ایس ڈی پی ٹی شاغنگانے، او بلوچستان نا شونداری کن بلدیاتی ادارہ غاتا بحالی و شیفکو کہول اسکان واکداری تا گدریفنگ ءِ اہم گوندسا پارے کہ نن یونین کونسل نا کہول آ انتظامی و مالی واکداری تننگ نا کوشست کننگ اٹی اُن۔ بلوچستان نا سیاسی ویل انا ایسری کن است اٹ کروک آتتون مذاکرات نا گمان نا سوج انا ورندی ءِ ترسا وزیراعلیٰ پارے کہ حکومت بلوچستان امنا کننگ نا رویہ ءِ تینائی کرینے، ہرانا کل آن بھلا شاہدی دادے کہ نن پی ٹی ایم نا منظور پشتین ءِ عثمان کاکڑ نا جنازہ ٹی بشخ ہلنگ نا موکل تسن۔ او پارے کہ اختلاف تخوک آ بندغ اس مرے یا پڑک اس، مذاکرات مننگ کیک، ولے ملک دشمن آتتون ہیت مننگ کپک۔ عثمان کاکڑ نا تینائی تا کنڈ آن اودے کسفنگ نا شکبری نا بابت سوج انا ورندی ٹی وزیراعلیٰ پارے کہ عثمان کاکڑ نا کزیت نا بابت اونا تینائی تتون ہر وڑ انا کمک کن سنبرینگوک اُن۔ اونا تینائی تتون اگہ شاہدی اس ارے تو ایتر تے، کل گڑا تیان ایڑتر خونی تسکان سر مرینہ۔ وزیراعلیٰ پوسکن آ مالی سال انا بجٹ نا بابت پارے کہ حکومت صوبہ نا کل علاقہ غاتیٹی انفراسٹرکچر و بنداوی ؤسراتی تا فراوانی کن کوشست کننگ اٹی ءِ۔ و بجٹ اٹی جانجوڑی و تعلیم نا بشخ ءِ اولیت تننگانے۔ او پارے کہ بجٹ اٹی پوسکن آ ہسپتال آتا تفنگ و ساڑی ہسپتال آتیٹی آسراتی تا ودفنگ کن کیہی ڈٹ آک اوار کننگانو۔ او پارے کہ اولیکو وار ہیلتھ کارڈ جاری کننگ حکومت نا بھلو سرسہبی اسے۔ وزیراعلیٰ پارے کہ حکومتی کوشست آتیان دا سال بنجائی پی ایس ڈی پی اٹی ہم بلوچستان کن ریکارڈ ڈٹ و فنڈ تخنگانے، او اخبار تیا زور شاغا کہ صوبہ نا شونداری و الس نا شونہالی کل ءِ دوست ءِ، و حکومتی کوشست آتے بھرمی جوڑ کننگ کن میڈیا ءِ ہم تینا بشخ ءِ شاغوئی تمک۔ حکومتی کوشست آتے پیدوار کننگے و جوان ءُ سلاہ تننگے۔ وزیراعلیٰ پارے کہ اینو نا دور اٹی شونداری نا عمل ءِ مونی دننگ، امن ایمنی ءِ برجا تخنگ، زرکاری نا وارخواہی تے پیدوار کننگ اٹ ذرائع ابلاغ اہم ءُ کڑد اس ادا کننگ کیک، دا وخت آ سینئر صحافیک ادارہ غاتے مون تروک ویل آتیان ہم وزیراعلیٰ ءِ معلومدار کریر، ہراڑا وزیراعلیٰ ویل آتا ایسری کن ہمو وخت آ پرمان جاری کرے۔