بلوچستان معدنیات نا ہستی تیان شپ ءِ، صادق سنجرانی

اسلام آباد: چیئرمین سینیٹ محمد صادق سنجرانی پارینے کہ صوبہ بلوچستان معدنیات نا دولت آن شُپ ءِ، گچین حکمت عملی نا رداٹ بلوچستان نا الس نا شونداری و شونہالی نا ڈٹ آتا بناءِ کننگ مریک۔ سینیٹ سیکرٹریٹ آن جاری بیان نا رداٹ داخیال آتا درشانی ءِ او کنٹری ہیڈ ریکوڈک علی احسان رند اتون گپ وتران کرسا کرے ہرا سے شنبے نادے آ داڑے پارلیمنٹ ہاؤس اٹی اوڑتون اوڑدہی کرے۔ چیئرمین سینیٹ محمد صادق سنجرانی پارے کہ صوبہ بلوچستان معدنیات نادولت آن شُپ ءِ۔ گرج داہیت انا ءِ کہ دا معدنیات آتے ملکی شونداری و شونہالی کن کاریم اٹ اتنگے۔ گچین حکمت عملی نا رداٹ بلوچستان نا الس نا شونداری و شونہالی نا ڈٹ آتا بناءِ کننگ مریک۔ انفراسٹرکچر ڈویلپمنٹ آن نمان گچینی اتنگ مریک۔ بلوچستان نا الس نا احساس محرومی تے چٹفنگ کن بنداوی حق انا فراوانی، روزگار، و پوسکن آ ڈٹ آک المی ءُ۔ داکان بیدس برطانیہ نا قائم مقام ہائی کمشنر چیئرمین سینیٹ محمد صادق سنجرانی تون پارلیمنٹ ہاؤس اٹی اوڑدہی کرے۔ اوڑدہی ٹی سیاسی تعلقداری، نوکاپ آن پد بحالی نا کوشست، واپار و زرکاری، پارلیمانی کمکاری و الس تون الس نا رابطہ غاتا بابت گپ وتران کننگا۔ سینیٹ سیکرٹریٹ نا رداٹ چیئرمین سینیٹ پاکستان و برطانیہ نا نیام اٹ تاریخی شریداری ءِ مون آ تخا، ہراٹی (اپ گریڈڈ اینہا نسڈ اسٹریٹجک پارٹنر شپ) (ای ایس پی) و جان جوڑی، تعلیم وٹیکنالوجی نا بشخ آتیٹی کمکاری آ زور شاغا۔ چیئرمین سینیٹ نوکاپ آن پد بحالی ٹی برطانیہ نا کمکاری و یورپ اٹی پاکستان نا غٹ آن بھلا واپاری و زرکاری پارٹنر نا وڑاٹ اونا کڑد انا ستا ءِ کرے و چیئرمین سینیٹ نا کنڈآن برطانیہ نا پدتموک ملک آتا واپاری اسکیم (ڈی سی ٹی ایس) اٹی پاکستان نا اوار مننگ نا ہم ستاءِ کننگا، ہڑتوم آ ملک آتا نیام اٹ آجو واپاری معاہدہ (ایف ٹی اے) نا گمان تیا گپ وتران کننگا۔ اوڑدہی ٹی ساڑی آ پارلیمانی فرینڈ شپ گروپ آتے متحرک کرساا پارلیمانی کمکاری و الس تون الس نا رابطہ غاتا اہمیت آ زور شاغنگا۔ اوڑدہی ٹی یوکے۔ پاکستان ریٹرن اینڈ ری ایڈمشن ایگریمنٹ و کانودی مائیگریشن ٹریک اٹ پیش رفت نا عزم انا درشانی ءِ کننگا۔ واپار، زرکاری، موسمیاتی بدلی، جان جوڑی، تکنیکی تعلیم و گوازی تیٹی کمکاری نا وارخواہی تیا سجفنگا۔ چیئرمین سینیٹ پاکستان و برطانیہ نا نیام اٹ سوگو تعلقداری تا اومیت نا درشانی ءِ کرسا تعلقداری تے سوگو تر کننگ نا تین پہ تینی عزم ءِ تالان کرے۔ داکان بیدس، چیئرمین سینیٹ کنگ چارلس IIIو میجسٹی کوئین کنسورٹ کیملانا تاجپوشی آ مبارکبادی تس و اونا اقتدار و برطانیہ نا پدریسہ شونہالی کن نیک است خواہی تا درشانی ءِ کرے۔

(اے پی پی)