عمران ریاض صحافی آخا، پارٹی سے نا ترجمان ءِ، مریم اورنگزیب

اسلام آباد: بنجائی حوالکاری و شینکاری وزیر مریم اورنگزیب پارینے کہ ننے صحافی و سیاسی جماعت نا ترجمان تیٹی پرخ کروئی مریک، ہرا صحافی سیاسی جماعت آتیٹی اوار مرے او صحافی نا حق انا دعویٰ ءِ کننگ کپک۔ داہیت ءِ او برطانوی صحافی سکندر کرمانی تون گپ وتران کرسا پارے۔ بنجائی وزیر حوالکاری پارے کہ اسہ صحافی اسے نا پن ءِ پا ہرا ننا حکومت اٹ بے گوامرے، اودے سم اٹ خلنگ، برمتہ کننگ یا اونا ترک آتے پرغنگانے۔ صحافی نا سوج آ اوپارے کہ عمران ریاض صحافی اس اف، سیاسی جماعت اسے نا ترجمان ءِ، ہرا صحافی سیاسی جماعت نا ترجمانی ءِ کے یا بیدادی ءِ سیبو ایتے تو اودے ہمو صحافی تتون اوار کننگپ ہرا صحافت نا آجوئی آ باور کیرہ۔ اسہ سوج اسے آ بنجائی وزیر پارے کہ عمران خان ءِ اونا دور اٹی جہانی صحافتی تنظیم میڈیا پریڈیٹر نا خطاب تس وخت اس کہ شہباز شریف نا دور اٹی پاکستان نا میڈیا فریڈم انڈیکس اٹ ہفت درجہ گچینی بس، عمران خان تینا دور اٹی صحافی تے دزگیر کرفے، اوفتا توار ءِ بند کرے، اوفتا چلینگوک آ پروگرام تے بند کرے، ٹی وی چینل آتے بندکرے وخت اس کہ ننا دور اٹی غٹ ٹی وی چینل آک چلینگ انگ ءُ، ہر اینکر ءِ ہیت کننگ نا آجوئی ءِ، کس اسے نا توار ءِ توننگتو، اسہ صحافی اسے نا پن ءِ پا ہرانا توار ءِ توننگانے؟ مریم اورنگزیب پارے کہ بندغ اس بے گوا مسنے تو نن اونا مذمت ءِ کرینن۔ عمران ریاض نا برخلاف عدالت آتیٹی کیس زیر سماعت ءِ۔ اوپارے کہ ننا حکومت آجوئی صحافت آ یخین تخک، ملک اٹی آجوئی صحافت نا مون آ دننگ نا سوب آن ہی میڈیا فریڈم انڈیکس اٹی پاکستان نا درجہ بندی گچین مسنے۔

(اے پی پی)