سیاسی جماعت آک ملکی تنصیب آتیا جلہو کپسہ‘انجینئرخرم دستگیر

اسلام آباد: بنجائی وزیر توانائی انجینئر خرم دستگیر خان پارینے کہ وخت اس ہم سیاسی جماعت اس تعلیمی ادارہ و دفاعی تنصیب آتیا جلہو گیر مفک و نئے ایمبولینس آتے ہُشک، 9 مئی آ عمران خان نا مخ تف آک سرکاری و عسکری ملکیت آتے پرغار و خاخرتسر، 2014 ٹی پی ٹی آئی، پی ٹی وی آ و 2023اٹی ریڈیو پاکستان پشاور آ جلہو کرینے، بیداد برانز، فوجی تنصیب آتیا جلہو و خاخر تننگ نا جواز ءِ پیش کننگ کپک۔ زموار آتا برخلاف کانود نا رداٹ کارروائی مریک، الس نا جان و مال و بنداوی حق انا رکھ ءِ کننگک، ملک اٹی لس گچین کاریک تینا مقررہ وخت آ مریرہ۔ سے شنبے نادے آ سیاسی حالیت آتیا درملکی میڈیا تون گپ وتران کرسا بنجائی وزیر پارے کہ وڈی خوری نا دوبہ ٹی عمران خان نا دزگیری آن پد مروک آ بیدادی نا واقعہ غاتا اِراہفتہ غان پد حالیت آک پیدوار مرسا مون آبسنو، ہراوڑاٹ واقعہ غاک مسر 9 و 10 مئی آ مروک آ برانز اٹی الس نا بھلو کچ اسے ٹی بشخ ہلتو و نئے دا برانز نا جمہوری وڑئسک۔ دااسہ تشدد اس ئسک و دانا مسخت سیاسی فائدہ دوئی کننگ ئسک و دا عمران خان نا پیروکار آتا شرپسندی ئسک۔ اوپارے کہ جمہوری برانز پرامن مریک و دانا درشانی نعرہ، پلے کارڈ و ایلو وڑوڈول آتے اٹ کننگک، و دابرانز نا اظہار تشدد، آتشزنی و بھسکاری تالان کننگ ناچم آتا کمک اٹ مفک۔ اوپارے کہ داسہ داہیت ہم اسُل پیدوار مسنے کہ دا مچی تیٹی ہراوڑنا بیان کننگک کہ ہزار آتا کچ اٹی مخلوق اوار الورہ و عمران خان نا دزگیری نا برخلاف مخلوق نا بھلو کچ اس اسُل پیشن الورہ۔

(اے پی پی)