شیری مزاری و فیاض الحسن چوہان اسک ہم پی ٹی آئی ءِ اِلار

اسلام آباد : 9 مئی نا واقعہ غاتیان پد پاکستان تحریک انصاف آن راہشون تا پیش تمنگ نا چرجوئی برجا ءِ۔ دا رد اٹ تدوک آ دے ایلو چنکا منکا راہشون و کارندہ غاتتون اوار اِرا بھلو پن شیری مزاری و فیاض چوہان اسک ہم پارٹی ءِ اِلار۔ مسکوہی بنجائی وزیر انسانی حق ڈاکٹر شیری مزاری پریس کانفرنس اسے نا وخت آ پارٹی ءِ اِلنگ نا پڑو کرسا پارے کہ کنا طب جوان اف، ہندا سوب آن ای سیاسی وڑ اٹ تینا کڑد ءِ سر تننگ ءِ بس کرینٹ۔او پارے کہ ای پی ٹی آئی ءِ اِلنگ اُٹ۔ و پین سیاسی جماعت اسے ٹی ہم ہننگ نا فیصلہ کتنٹ۔ ایلو کنڈ آ مسکوہی ایم پی اے پنجاب فیاض چوہان پارینے کہ ای 9 و 10مئی نا واقعہ غاتا مذمت ءِ کیوہ، بایدے دا وڑ انا واقعہ غاک مفس۔ ای بھاز مہالو پاریسٹ کہ نن سیاست دان اُن، و سیاسی جماعت آتا پالیسی تے شیف خلین۔ ننے ریاست و ریاستی ادارہ غاتتون جنگ لگنگ زیب تفک۔ دا ہیت آتیان پد کن کن زمان پارک نا درگہ غاتے بند کننگا۔ اینو ای باقاعدہ پڑو کننگ اُٹ کہ داکان پد پی ٹی آئی تون کنا ہچ ءُ تعلقداری اس مفرو۔

(مانیٹرنگ ڈیسک)