فسٹیولانا درمان کن 9 ہند جوڑ کننگانے‘ڈاکٹرحق نواز

کوئٹہ: یورولوجسٹ کوئٹہ ہسپتال ڈاکٹر حق نواز، پروانشل کوآرڈی نیٹر ایم این سی ایچ پروگرام ڈاکٹر اسماعیل میروانی ئسک پارینو کہ مچ آ دنیا ٹی 20 لکھ آن زیات زالبول فسٹیولانا ناجوڑی نا گواچی ءُ پاکستان سالانہ کم و ود 4آن 5 ہزار زالبول داناجوڑی نا گواچی مریرہ کوئٹہ تون اوار مچ آ ملک اٹی فسٹیولانا درمان کن 9 ہند جوڑ کننگانے ہراڑے نئے بیرہ فسٹیولا نا ناجوڑی ٹی اختہ زالبول آتا مفت درمان ءِ کننگک بلکن اوفتے سفری خڑچ آتے ہم تننگک، حکومت پاکستان فسٹیولا نا چٹفنگ کن غٹ دوئی وسیلہ غاتے کاریم اٹ اتے۔ داہیت ءِ اوفک سے شنبے نادے آ کوئٹہ پریس کلب اٹی پریس کانفرنس کرسا پاریر۔ اوفک پاریر کہ مچ آ دنیا ٹی 23 مئی آ انٹرنیشنل فسٹیولاڈے اڈتننگک ہرانا بنداوی مسخت فسٹیولاٹی اختہ زالبول آتا پٹنگ وسرسہب درمان نا کمک اٹ اوفتا زند ءِ بدل کروئی ءِ، فسٹیولانا ناجوڑی ہم بدبختی اٹ پدتموک ملک آتیٹی رہینگوک آ زالبول آتا ہندن ءُ ناجوڑی اسے ہراڑان نئے بیرہ بچنگ مریک بلکن اونا گچین درمان ہم ممکن ءِ دا ناجوڑی زچگی نا دورانیہ نا مرغن مننگ نا سوب آن مریک و دوران زچگی چنانا اختہ مننگ نا سوب آن چرو و گڑاس وخت پاخانہ نا تھیلہ غاتیٹی ٹُنگ اس مریک ہراڑان پدریسہ چرو و پاخانہ وہیک ہزار آ زالبول ہرسال دا شرمناک ناجوڑی نا سوب آن راج آن مر مریرہ و تنیائی نا زند ءِ گدریفنگ آ بیوس مریرہ دا ناجوڑی بذات خود داہیت انا شاہدی ءِ کہ راج اٹ نیاڑیءِبریبری نا ہند دوئی اف و نئے جان جوڑی نا بنداوی آسراتی ساڑی ءِ۔ اوپارے کہ مچ آ دنیا ٹی 20 لکھ آن زیات زالبول دامرض انا گواچی ءُ وخت اس کہ پاکستان اٹی کم و ود سالانہ 4آن 5 ہزار زالبول دا ناجوڑی نا گواچی مریرہ ہرانا بنداوی سوب معاشرتی ناہمواری، فرسودہ رسم و راج، نیزگاری، تعلیم نا کمتی، فیملی پلاننگ آسراتی تا ساڑی مفننگ، تربیت یافتہ جان جوڑی نا کارندہ غاتا کمتی و علاقائی کہول آ بنداوی آسراتی تا ودی مفننگ اوار ءِ۔ اوفک پاریر کہ پاکستان نیشنل فورم آن وومن ہیلتھ 2005 ء آن یواین ایف پی اے نا کمک اٹ داوڑنا غٹ زالبول آتا مچ آ ملک اٹی مفت درمان ءِ کننگ ءِ 2017ء آن داتم اسکان دا غٹ آسراتی تے فسٹیولافاؤنڈیشن و یو این ایف پی ا ے نا کمک اٹ تننگ انگ ءِ ہرا فسٹیولانا مرض اٹی اختہ ءُ فسٹیولانا مرض اٹی اختہ زالبول آتا درمان کن کوئٹہ، کراچی، حیدرآباد، لاڑکانہ، ملتان،لاہور، پشاور، ایبٹ آباد و اسلام آباد اٹی ہند جوڑ ءِ ہراڑے نئے بیرہ ناجوڑآتا مفت درمان ءِ کننگک بلکن اوفتے سفری خڑچ ہم تننگک تانکہ او فسٹیولاہند آتیا سرمننگ کیر۔ اوفک پاریر کہ حکومت پاکستان فسٹیولا نا چٹفنگ کن غٹ دوئی وسیلہ غاتے کاریم اٹ اتسا بھلو کچ اسے آ پرمڈوائف نا ٹریننگ نا بناءِ کننگے و اوفتے گچین سروس اسٹرکچر تننگے تانکہ ہر پڈ پُر زالبول نا خیالداری و زیرنگرانی زچگی نا عمل ءِ ممکن کننگ مرے و فسٹیولا آن بچنگ ممکن مننگ کے و غٹ بنداوی جان جوڑی ہند و دیہی جان جوڑی نا ہند آک پورو وڑاٹ کاریم نا بناءِ کیر تانکہ زالبول آتے بنداوی و ایمرجنسی جان جوڑی نا آسراتی دُوبننگ کے۔

(اے پی پی)