عسکری و قومی تنصیب آتیا جلہو کروک آتے النگپ، توصیف گیلانی

کوئٹہ: سیاسی و راجی راہشون سید توصیف گیلانی، محمد عابد خان ئسک پارینو کہ پاک فوج ننا ریڈلائن ءِ عسکری و قومی تنصیب آتیا جلہو و جلاؤ و گھیراؤ ٹی اوار زموار آک ہچ ءُ رعایت اسے نا حقدار افس، بنجائی و صوبائی حکومت آک، کانود نافذ کروک آ ادارہ غاک پرغ و بٹ و جلاؤ گھیراؤ ٹی اوار بندغ آتے دزگیر کرسا اوفتے اوفتا کروک نا سزا ایتر تانکہ پین وخت اس کس اس ہم عسکری و سرکاری تنصیب آتیا جلہو کننگ نا جرات کننگ کپ۔ داہیت ءِ اوفک سے شنبے نادے آ علی افتخار، سردار بہرام خان، فیاض، سعداللہ بادیزئی، پائند خان کرد و ایلو فتے تون اوار کوئٹہ پریس کلب اٹی پریس کانفرنس کرسا پاریر۔ اوفک پاریر کہ پاکستان تحریک انصاف نا سلہہ بند جتھ و غنڈہ تا کنڈآن قومی عسکری تنصیب، شہید آتا یات گار، جناح ہاؤس، ریڈیو پاکستان و ایلو ملکیت آتیا جلہوو اوفتے خاخر تننگ نا مذمت ءِ کینہ 9 مئی پاکستان نا تاریخ نا تہار انگا دے ءِ دادے آ پی ٹی آئی نا کارندہ غاک تینا راہشون نا دزگیری آ پاکستان نا فوجی ملکیت آتیا جلہو کریر، لاہور نا کور کمانڈر نا اُراءِ نذر آتش کریر دا ہمو اُرا ءِ ہرا قائد اعظم محمد علی جناح نا اُرائسک ہرا دے او تینا ہنکین کن لاہور اٹی ہلکوسس ہرا اوکان پد ملٹری نا حوالہ کننگا و ولدا کور کمانڈر لاہور ءِ دا اُراءِ تننگا پاکستان اٹی مہالو ہم چندی سیاسی راہشون دزگیر مسنو، شہید مسنو، پاہو تننگانو ولے اسہ سیاسی جماعت اسے نا کارندہ غاک ہم داوڑنا حرکت کتنو ہراوڑنا حرکت پی ٹی آئی نا قائد و کارندہ غاک کرینو ہراڑا دشمن ہم خوشی کننگ ءِ۔ اوفک پاریر کہ ذوالفقار علی بھٹو ءِ پاہو تننگا ولے پاکستان پیپلزپارٹی نا اسہ سیاسی کارندہ اس ہم فوجی تنصیب آتیا جلہو کتو، جمعیت اہلحدیث پاکستان نا سروک علامہ احسان الٰہی ظہیر ءِ بمب دھماکہ اٹ دشمن واکدارآک شہید کریر، ہمووخت آ علامہ شہید نا جنرل ضیاء الحق نا حکومت آن اختلاف ئسک و گڑاس مخلوق ہمووخت آ دا واقعہ نا زموار ہمووخت انا حکومت ءِ گوندا ولے جمعیت اہل حدیث نا کارندہ غاک مچ آ پاکستان اٹ پیش تمار و پرامن برانز کریر اسہ ملکیت اسے ہم خاخر تتور و نئے فوجی تنصیب آتے شست کریر۔

(اے پی پی)