ملکی مرات آتے نسخان تروک آک سزا غان بچپسہ،‘خلیل جارج

کوئٹہ: پارلیمانی سیکرٹری اقلیتی امور خلیل جارج پارینے کہ بلوچستان نا اقلیتی برادری پاک فوج و ایلو کانود نافذ کروک آ ادارہ غاتا شہید آتے خراج عقیدت پیش کیک 25 مئی یوم تشکر شہدانا بابت اقلیتی برادی نا کنڈآن ریلی اس کشنگک و شہید آتا یات اٹی شمع روشنا و خصوصی دعا کننگک، بلوچستان اٹی آباد اقلیت آک 9 مئی آ آرمی تنصیب آتیا جلہو، قائد اعظم ہاؤس و ایلو تاریخی ہند آتے ہُشنگ و شہید آتا یات گار آتا بے شرفی نا مذمتءِ کیرہ۔ داہیت ءِ او سے شنبے نادے آ داڑے پریس کلب اٹی پریس کانفرنس کرسا پارے۔ خلیل جارج پارے کہ پاکستان نا ازلی دشمن بھارت ارب آ، کھرب آ روپئی خلسا 75 سال آن ہرانسخان ءِ ننے تننگ کتو او پی ٹی آئی نا قائد ین و سلہہ بند جتھ آک کرسا نشان تسر و پی ٹی آئی کارندہ غاک فوجی تنصیب، جناح ہاؤس، ریڈیو پاکستان و ایلو سرکاری ماڑی بلکن ایمبولینس آتیان مریض آتے کشسا اوفتے خاخر تسر دا عمل نئے بیرہ قابل مذمت بلکن قابل گرفت ہم ارے۔ اوپارے کہ عسکری و سرکاری ملکیت آتیا جلہو آتیٹی اوار زموار آتون ہچ ءُ رعایت اس کننگپ اوفتے دزگیر کرسا اوفتے عبر ت نا نشان کننگے تانکہ پین وخت اس کس اس ہم عسکری تنصیب آتیا جلہو آتا سجفنگ ہم کپ۔ اوپارے کہ اینو مچ آ ملک پاک فوج و پاکستان نا حرمت کن یکجہتی نا درشانی ءِ کننگ ءُ دشمن مدام کوشست کرینے کہ پاک آرمی و الس نا نیام اٹ غلط گمانی ودی کننگے ولے دشمن ءِ مدام اوٹی بے سہبی مس۔ اوپارے کہ 25 مئی یوم تشکر شہدانا وخت آ خراج عقیدت پیش کینہ و 25 مئی یوم تکریم شہدانا وخت آ بلوچستان نا اقلیتی برادری ریلی اڈتننگ، شہید آتا یات اٹی شمع روشن و خصوصی دعا تا بست وبند کیک۔ اوپارے کہ ملک انا دفاع و الس نا جان و مال انا رکھ اکن تینا جون تینددر کروک آ شہید آک ننا قومی ہیروک ءُ ہرافتا قربانی تے اسُل است آن دننگ مفک۔ بلوچستان نا اقلیت آک شہید آتے خراج عقیدت پیش کرسا اوفتا خاہوت آتے باور کرفرہ کہ پاکستانی الس اوفتے اسُل است آن دپک۔

(اے پی پی)