بلوچستان اسمبلی، پی آئی اے نا کرا تیٹی کمتی نا بابت قرار داد منظور

کوئٹہ: بلوچستان اسمبلی پاکستان انٹرنیشنل ائیرلائنز (پی آئی اے) نا ملک اٹ پرواز تا کرا تا کمتی تا بابت قرارداد ءِ امنائی اٹ منظور کرے۔ تدوک آ دے بلوچستان اسمبلی نا دیوان اٹ پارلیمانی سیکرٹری بشریٰ رند قرارداد ءِ پیش کرسا پارے کہ کوئٹہ غان اسلام آباد، کراچی و لاہور نا نیام اٹ چلینگوک پی آئی اے و ایلو ایئر لائنز تا کراک ملک اناایلو شار تیان بھاز زیات ءُ وخت اس کہ کراچی آن لاہور و اسلام آباد نا نیام اٹ مزل و وخت زیات مننگ آن پد ہم دا سیکٹر آتا کرا کم ءِ دا امتیازی سلوک و بے انصافی آ بلوچستان نا الس اٹ احساس محرومی مننگ فطری ءُ عمل اسے‘ ہندا سوب آن دا ایوان صوبائی حکومت آن خواست کیک کہ او بنجائی حکومت تون ہیت کے کہ او کوئٹہ غان اسلام آباد، کراچی و لاہور نا نیام اٹ چینگوک پی آئی اے وایلو ایئر لائنز تا کرا تے دمدستی کم کرفنگ کن عملی گام گیج کے تاکہ الس اٹ ساڑی احساس محرومی ءِ چٹفنگ مرے‘۔ قرار داد آ ہیت وگپ کرسا بشریٰ رند پارے کہ اسہ سال اس مست ہم ای ایوان اٹ ہندا ویل آ قرارداد پیش کریٹ ولے بلوچستان بے وارث ءُ صوبہ اسے ہرانا کس ءِ فکر اف‘ او پارے کہ ہرا بندغ آک فضائی سفر کیرہ اوفتے ٹی پنجا درسَد بندغ آک ہمودو ہرافک مجبوری سے نا سوب آن سفر کیرہ‘ کوئٹہ غان کراچی اسہ گھنٹہ نا مری آٹے داکان پد ہم 37ہزار روپئی چارج کننگک وخت اس کہ کراچی آن اسلام آباد اِرا گھنٹہ نا مری آمننگ آن پد ہم بیرہ 16ہزار روپئی کننگک۔ اوپارے کہ بلوچستان اسمبلی بایدے پی آئی اے و سیرین ایئر لائنز نا سروس آتیان بائیکاٹ ناپڑو کے۔ پشتونخوا میپ نا باسک نصراللہ زیرئے قرارداد نا مخ تفی ءِ کرسا پارے کہ پی آئی اے نا کمامدار آک بلوچستان ءِ گوجالنگ اٹی ءُ‘ او ایوان نا ہیت ءِ ہم خف توپسہ ہندا سوب آن اوفتا سروس آتا بائیکاٹ ءِ کرسا تعلقدار کمامدار آتے ایوان اٹ بٹنگ انگے‘ دا وخت آ ڈپٹی اسپیکر پی آئی اے و سیرین ایئر لائنز نا کمامدار آتے بروک آ دیوان اٹ اسمبلی ٹی بٹنگ انگ نا رولنگ ترسا پارے کہ تعلقدار کمامدار آک بریر و دا بابت بریفنگ ایتر۔داکان گڈ او ایوان نا سلاہ اٹ قرارداد نا منظوری نا رولنگ ترسا اسمبلی نا دیوان ءِ پنچ شنبے 27جنوری اسکان پد بٹے۔