پاکستان پوسکن آ ایڈمنسٹریٹو یونٹ آتیان بیدس شون ہلنگ کپک،بنجائی وزیر مصطفی کمال

کراچی، بنجائی وزیرِ جانجوڑی مصطفی کمال پارینے کہ پاکستان نا شونداری پوسکن آ ایڈمنسٹریٹو یونٹ جوڑ کننگ آن بیدس مننگ کپک‘ کراچی ایکسپو سینٹر اٹی برجا فارما ایشیا انٹرنیشنل 2026 نمائش نا گڈیکو دے بنجائی وزیرِ جانجوڑی مصطفی کمال کمپنی تا اسٹال آتا دورہ ءِ کرے۔ دا وخت آ دود آن تران کرسا او پارے کہ دا وڑ انا سخت حالیت آتے ٹی پیشن ملک آن فارما کمپنی تے اتوک آتے مبارکبادی پیش کیوہ، انتظامیہ نا کڑد ستا کڑزک، ہندا وڑ اٹ ملازمت تا وارخواہیک ودرہ۔ او پارے کہ دا وڑ انا ایونٹ آتیان ملک آک شون ہلیرہ‘ پاکستان ہم ہندا کسر آ روان ءِ۔ مصطفی کمال پارے کہ ملک اٹی بھاز آ ویل آک خراب گورننس نا سوب آن ءُ، انتئے کہ واکداریک شیفکو کہول اسکان گدریفنگتنو‘ 100 درسَد آن کراچی ءِ بیرہ 3 درسَد رسینگک‘ او پارے کہ بروک آ دے آتیٹی پوسکن آ انتظامی یونٹ مریرہ‘ ہرافتا جوڑ مننگ آن ویل آک ایسر مریرہ‘ وخت اس بریک ہراتم ہراتم جتاجتا ہند آتیا اسہ وخت آ ایکسپو اڈ تننگرور۔ او پارے کہ ایم کیو ایم مستین آن زیات ویل آتیا ہیت کننگ اٹی ءِ و دا بیرہ گروپ اسے نا آخا بلکہ پاکستان نا شونداری نا باندات ءِ، انتظامی یونٹ جوڑ کننگ آن بیدس ویل آک ایسر مفسہ، واکداری رسینگ پننگ آن مشکل آک ودانو۔ بنجائی وزیر پارے کہ ساڑی حالیت آتیان بیرہ منہ درزن خاہوت آتے فائدہ مس، وخت اس کہ ایلو ملک مشکل آتا گواچی مسنے‘ کراچی اینو خراب انگا علاقہ غاتے ٹی اوار ءِ، وخت اس کہ کنا دور اٹی دا شوندار انگا شار تیٹی حساب مسکہ‘ ویکسین تا رد اٹ گپ و تران کرسا مصطفی کمال پارے کہ ہلنگ اٹی بے ضابطگی تا رپورٹ آک مون آ بسنو و دا باندات آ وضاحت عدالت اٹی مون آ بریک۔ او پارے کہ ایم کیو ایم نا باسک آتا کچ کم مننگ آن بیدس ہم پارٹی مدام کل ویل آتیا ہیت کرینے و آخبت اٹی ہم دا ریسہ برجا سلک۔ او مستی پارے کہ اِرا تُو مست ملین ڈالر نا معاہدہ کننگاسس، ویکسین کن چین اتون ہم حوال کننگا، اولیکو ویکسین پالیسی ہم درستی راستی کرفنگاسس۔