حکومت برآمد کار آتے مون تروک ویل آتا ایسرکن سلاہ اٹ اتنگ ءِ،جام کمال خان

اسلام آباد، بنجائی وزیر واپارجام کمال خان پارینے کہ حکومت برآمد کروک آتے مون تروک ویل آتا ایسری، کاروبارکننگ نا خڑچ اٹی کمتی و جہانی منڈی تسکان رسینگ ءِ ودفنگ کن تعلقدار وزارت، محکمہ و پرائیویٹ بشخ آتتون پدریسہ رابطہ ٹی ءِ۔ دارداٹ برآمد آتا گوبر لائخی ءِ گچین کننگ کن عملی گام گیج آتیا کاریم برجاءِ۔ دا خیال آتا درشانی ءِ او وزارت واپاراٹی برآمدکروک وبڑزکو سرکاری کمامدار آتتون ارٹمیکو بڑزکو کہولی سلابتی دیوان نا کماشی ءِ کرسا کرے، ہراٹی پاکستان نا برآمد آتے زہمی کروک آ ویل و اوفتا ایسری کن تعلقدار سرکاری محکمہ غاتا کنڈآن کننگوک پیشرفت نا جاچ ءِ ہلنگا۔ دیوان اٹی وزیر مملکت خزانہ و بنگکاری بلال اظہر کیانی، وزارت واپار نا سینئر کمامدارو تعلقدار وزارت محکمہ غاتا نمائندہ غاک بشخ ہلکر، وخت اس کہ برآمد کروک سرکڑدہ غاک بالمشافہ و آن لائن بشخ ہلکر، توانائی نا خڑچ، خراج، مالی کمکاری، ضابطہ ئی وڑوڈول، برآمدی آسراتی و جہانی منڈی تسکان رسینگ تون اوار اہم باندات آتیا شرہ مس۔ دا وخت آتدوک آ دیوان اٹی برآمدکروک آتا کنڈآن چست کروک آ ویل و تعلقدار سرکاری ادارہ غاتا ورندی تیا تالان جوان جاچ اس پیش کننگا ہراٹی پدتموک باندات، پیشرفت و پین پالیسی گام گیج آتا گرج ءِ پک کننگا۔ بنجائی وزیر جام کمال خان پارے کہ پاکستان چین، سویلی کوریا، ترکیہ، جاپان و ویتنام تون اوار اہم واپاری شریدارآتتون اولیتی واپاری آسراتی تیٹی گچینی کن کوشست کننگ ءِ۔ اوپارے کہ چین اتون ٹیرف رعایت آتیٹی ودکی کن گپ وتران برجاءِ وخت اس کہ سویلی کوریاتون اولیتی واپاری بست وبند آتیا ہم پیشرفت مننگ ءِ، ایلو ملک آتتون رابطہ سفارتی مشن، واپاری دفتر و ہڑتوم آ کنڈآتا سلابت نا کمک اٹ برجاءِ۔ ترکیہ ٹی پاکستانی ٹیر تا برآمد آتے مون تروک ویل آتا بابت دیوان ءِ پاننگاکہ ٹیر تا گڑاس وڑتے ہڑتوم آ کنڈآتا اولیتی واپاری معاہدہ نا رداٹ رعایت دوئی ءِ، برآمد کروک آتے پاننگاکہ او تعلقدار گڑاتا سرجم و ایچ ایس کوڈز فراوان کیر تانکہ ایلو سلوک آ ویل آتے ترکیہ نا کمامدارآتتون ہرفنگ مرے۔ دیوان اٹی صنعتی بشخ اکن توانائی نا خڑچ خاص وڑ اٹ گیس لیوی نا زہم تا جاچ ءِ ہلنگا۔