پاکستانِ و مالدیپ نا سفارتی تعلقداری تا 60 سال ستا کڑزک،سید یوسف رضا گیلانی

اسلام آباد، چیئرمین سینٹ سید یوسف رضا گیلانی اسلام آباد اٹی مالدیپ نا صدر ڈاکٹر محمد معیزو تون اوڑدہی کرے، ہراٹی پاکستان و مالدیپ نا نیام اٹی متکن آ سنگتی تعلقداری تے پین سوگو جوڑ کننگ، پارلیمانی سفارت کاری نا شون تننگ، واپاری و زرگزرانی کمکاری ٹی ودکی و جتا جتابشخ آتیٹی ہڑتوم آ کنڈآن رابطہ غاتے ودفنگ آ گپ وتران کننگا۔ اوڑدہی ٹی چیئرمین قائمہ کمیٹی دفاع سینیٹر طلحہ محمود، چیئرمین قائمہ کمیٹی داخلہ سینیٹر فیصل سلیم رحمان، چیئرمین قائمہ کمیٹی خارجہ باندات سینیٹر آغا شاہ زیب درانی، سیکرٹری سینٹ سید حسنین حیدر و ایلو بڑزکو کمامدار آک ہم ساڑی ئسر۔ چیئرمین سینٹ سید یوسف رضا گیلانی پارے کہ پاکستان و مالدیپ نا نیام اٹی تعلقداریک تین پہ تینی پت، شرف و اسیجائی فائدہ غاتیان تالان ءُ۔ ہڑتوم آ ملک آتا نیام اٹی پارلیمانی، سفارتی و زرگزرانی تعلقداریک پدریسہ شون ہلنگ اٹی ءُ و دا تعلقداری تے پوسکن آ وڑتتون ہمگرنچ کننگ نا بھلو گنجائشت اس ارے۔ او پارے کہ ہڑتوم آ ملک آک 2026ء اٹی سفارتی تعلقداری تا 60 می سال دے ءِ اڈ تننگ اٹی ءُ، ہرا تین پہ تینی سنگتی و کمکاری نا سفر اٹی اہم ءُ مزل نا نشان اسے۔ چیئرمین سینٹ پارے کہ جتا جتا بشخ آتیٹی مفاہمتی یادداشت آتیا دستخط ہڑتوم آ ملک آتا نیام اٹی کمکاری ءِ ودفنگ نا اسیجائی ارادگی نا ڈیک ءِ۔ او دا ہیت آ زور شاغا کہ پارلیمانی سفارت کاری پاکستان و مالدیپ نا نیام اٹی تین پہ تینی پت، افہام و تفہیم و ادارہ ئی رابطہ غاتے پین سوگو جوڑ کننگ اٹی اہم کڑد ادا کننگ کیک۔ او پارے کہ پارلیمانی ڈل آتا ہن وبر، پارلیمانی فرینڈشپ گروپ و قائمہ کمیٹی تا نیام اٹی رابطہ غاتا کمک اٹ ہڑتوم آکنڈآن کمکاری ءِ پین گچین جوڑ کننگ مریک۔ دا وڑ ہڑتوم آ ملک آک اسہ ایلو نا آزموندہ غاتیان فائدہ ہرفسا تین ہ تینی استخواہی تا باندات آ خڑک کمکاری ءِ شون تننگ کیرہ۔