ڈیمک علاقہ سے نا شونداری وشونہالی ٹی اہم کڑد ادا کیرہ‘ میرظہوربلیدی

کوئٹہ (خ ن) صوبائی وزیر خزانہ ظہور احمد بلیدی پارینے کہ ڈیمک علاقہ سے نا شونداری وشونہالی ٹی اہم کڑد ادا کیرہ‘ دا ڈغار نا شیف انا دیر ءِ برجا تخنگ تون اوار علاقہ نا زمیندار تے مفت دیر فراوان کننگ نا آسراتی ایترہ‘ کشت وکشار‘ ماہی گیری و مالداری نا بشخ ءِ شوندار کیرہ۔ دا خیال آتا درشانی ءِ او تینا حلقہ ٹی زیرتعمیر ڈریمیکول ڈیم انا جاچ ہلنگ نا وخت آکرے۔ صوبائی وزیر پارے کہ ڈریمیکول ڈیم انا تعمیر آن پیڈرک، ڈریمیکول و حلقہ نا ایلو کیہی خلق آتے فائدہ مریک۔دا ڈیم انا پورو مننگ آن علاقہ ٹی کشت وکشار‘ مالداری نا بشخ شون ہلیک و علاقہ نا بندغ آک شونہال مریرہ۔ اوپارے کہ حلقہ نا الس نا آسودہی و جم فائدہ غاتے مون آ تخسا شونداری ڈٹ آتے گڈیکو دروشم تننگانے۔دا شونداری ڈٹ آتا بھرم آن الس ءِ فائدہ مریک۔ صوبائی وزیر پارے کہ حلقہ نا غٹ علاقہ غاتا شونداری ءِ اسہ وڑ شونداری ءِ تینا اولیت اٹ اوار کننگانے و حلقہ نا اسہ علاقہ اس ہم شونداری ڈٹ آتے ٹی گوجالنگ تنے۔ او پارے کہ ڈریمیکول ڈیم انا پورو مننگ آن ہزار آ ایکڑ ڈغار آباد مریک و دا ڈیم علاقہ ناالس نا مالی مشکل آتے کم کننگ اٹ کمکار مریک۔ صوبائی وزیر پارے کہ دا ڈیم انا تعمیر تدوک آسال بنا کرے و زوت پورو مریک۔