وزیر اعظم نا بنگلہ دیشی ہم منصب آ فون، کورونا غان فوتگی تیا ہڑزخواہی

0

Get real time updates directly on you device, subscribe now.

 اسلام آباد ( آن لائن)وزیر اعظم عمران خان پارینے کہ پاکستان بنگلہ دیش تون کمک، احترام و بریبری نا بنداو آ اِرا کنڈی تعلقداری تے سوگو کننگ نا خواہندار ءِ، ہڑتوم آ ملک آتے امن و ایمنی و شونہالی کن علاقائی کمک ءِ جوان کننگ نا گرج ءِ، ڈیہہ اٹ سلامتی و شونہالی کن کشمیر نا ویل آتے امن و ایمنی نا ایسری المی ءِ۔ وزیر اعظم دا خیال آتا درشانی ءِ تدوک آ دے بنگلہ دیش نا وزیر اعظم شیخ حسینہ واجد تون ٹیلی فونک ہیت و گپ اٹ کرے۔ او وخت آ وزیر اعظم عمران خان بنگلہ دیش اٹ کورونا وائرس دَین نا سوب آن انسانی جان تا زیان مننگ آ ہڑزخواہی کرے و وائرس نا تالانی ءِ توننگ کن بنگلہ دیشی کماش آتا گام گیج آتا ستا ءِ کرے، ہڑتوم آ راہشونک کورونا وائرس نا دوئی مروک آ چینلنج آتون مون تننگ کن ہرفوک آ گام گیج آتیا ہیت وگپ کرے۔ وزیر اعظم عمران خان اودے انسانی زند و روزگار ءِ بچفنگ کن تینا حکومت نا کنڈآن کروک آ گام گیج آتا بابت معلومدار کرے۔ عمران خان بنگلہ دیشی وزیر اعظم ءِ شوندار آ ملک آتیکن کرز اٹ ریلیف تننگ نا جہانی گام گیج نا بابت ہم معلومدار کرے۔ وزیر اعظم بنگلہ دیش اٹ بروک آ نوکاپ آن جانی و مالی نسخان آ اُست ہسونی نا درشانی ءِ کرے و دا قدرتی آ آفت اٹ زہمی مروک آ بندغ آتا زوت اس بحالی کن دعا کرے۔

Get real time updates directly on you device, subscribe now.

Leave A Reply

Your email address will not be published.