چین کورونا نا توننگ و زرگزرانی بحالی کن مچ آ دنیا نا کمک ءِ کننگ ءِ، شی جن پنگ

بیجنگ (اے پی پی) چین نا صدر شی جن پنگ پارینے کہ اصلاحات و اوپن پالیسی نا پالیسی ءِ اختیار کننگ آن پد چین کرار کرار آ سوشلسٹ زرگزرانی نظام اس جوڑ کرے، ہراٹی پدریسہ شونداری و سوگوی نا سفر برجاءِ۔ اوبیجنگ اٹ کاروباری بندغ آتیکن اڈ ہلوک آ اسہ فورم اسے ٹی پارے کہ نوول کوروناوائرس نا دین چین نا زرگزران و جہانی زرگزران آ بھاز زیات اثرشاغانے، چین اٹی بھاز انگا مارکیٹ آتے دباوتون مون تروئی تمنگ ءِ، اوپارے کہ نن مارکیٹ آتا رکھ، کاروباری جوزہ ءِ مون آ دننگ و کاروباری ادارہ غاتے زیات آن زیات کڑد ادا کننگ اٹ کمک فراوان کننگ کن ہروڑناکوشست کین تانکہ زیات آن زیات شونداری نا دوئی کننگ و زرگزرانی شونداری کن بنداوی واک جمع کننگ مرے۔ شی جن پنگ پارے کہ چینی قوم انا اسیجائی کوشست آتا کمک اٹ چین دینی مرض آتا توننگ و کنٹرول نا چرجوئی ٹی بھلو اسٹریٹجک ءُ بھرم اس دوئی کرینے و زرگزرانی شونداری سوگو وڑاٹ گچین مننگ ءِ۔ اوپارے کہ چین دینی ناجوڑ تا توننگ، کنٹرول و زرگزرانی بحالی نا کسر آ مچ آدنیا نا کمک ءِ کننگ ءِ و حالیت آک گمان آن گچین ءُ، ننے تینا پت ءِ سوگو کننگ و مشکل آتے ایسر کروئی مرے و مچ آ سال گچین زرگزرانی شونداری کن کوشست کننگے۔