بلوچستان کمیشن نا چیئرپرسن نا تقرری کن اخبار اٹ اشتہار تننگک‘فضیل اصغر

کوئٹہ (خ ن) چیف سیکرٹری بلوچستان کیپٹن (ر) فضیل اصغر ناکماشی ٹی بلوچستان کمیشن نا چیئرپرسن نا تقرری کن سرچ کمیٹی نا اولیکو دیوان اڈ ہلک‘ دیوان اٹ اسمبلی ناباسک ماہ جبین شیران، بی بی شاہینہ، سیکرٹری کانود محمد اکبر حریفال، سیکرٹری خزانہ نورالحق بلوچ، سیکرٹری وویمن ڈویلپمنٹ بلال جمالی اسک بشخ ہلکر۔ چیف سیکرٹری پارے کہ کمیشن نا چیئرپرسن نا تعیناتی کن اخبار اٹ اشتہار تننگک و داڑتون اوار اسمبلی نا زالبول باسک آک ہم چیئرپرسن نا تعیناتی کن جوان ءُ اومیتدار اس پٹنگ اٹ کمکار مریرہ ہرا زالبول تا آسراتی کن کاریم کے۔ چیف سیکرٹری پارے کہ کمیشن نا بنداوی مسخت نیاڑی تا آجوئی‘ وارخواہی تا بریبری و نیاڑی ونرینہ غاتا نیام اٹ زرگزرانی و اقتصادی حالیت و نیاڑی تے ٹی ہر وڑ انا امتیازی سلوک ءِ چٹفنگ ءِ۔ کمیشن نا اہم انگا کاریم تے ٹی نیاڑی تا شونداری کن حکومت ناکنڈآن کروک پالیسی‘ پروگرام و ایلو گام گیج آتا جاچ و نیاڑی تا حیثیت و حق آتے زہمی کروک غٹ پالیسی‘ کانود‘ قاعدہ وصابطہ نا جاچ و اونارد اٹ صنفی مساوات اوار ءِ۔