اسپیکر قومی اسمبلی نا وڈھ بلوچستان اٹی امن وایمنی نا حالیت آتا نوٹس

اسلام آباد: اسپیکر قومی اسمبلی راجہ پرویز اشرف وڈھ بلوچستان اٹی امن و ایمنی نا حالیت آتا نوٹس ءِ ہلسا حکومت ءِ پارت کرینے کہ تعلقدار سیکورٹی کمامدارآتے دا باندات نا دمدستی ایسراس کشنگ نا پارت کننگے۔ پنچ شنبے نادے آ قومی اسمبلی ٹی اعتراضی ٹک آ آغا حسن بلوچ پارے کہ تدوک آ منہ دے آن وڈھ بلوچستان اٹی سلہہ جتھ مخلوق ءِ یرغمال کرینو، اِرا متحارب ٹولی مون پہ مون ءُ، سردار اخترجان مینگل نا باوہ نا جہد ءِ مخلوق یات تخک، گڑاس زموار اسہ وار ولدا بلوچستان نا حالیت آتے خراب کننگ ءُ، کانود نافذ کروک آ ادارہ غاک ہم اوفتا مون آ بیوس ءُ۔ اوخواست کرے کہ اسپیکر دا جھیڑہ ءِ تورفنگ کن تینا کڑد ءِ ادا کے، وزارت داخلہ ءِ دا چرجوئی ٹی خصوصی پارت جاری کننگے۔ اسپیکر وزیر دفاع خواجہ محمد آصف نا پارت نا وڈھ اٹی امن و ایمنی نا حالیت آتے تعلقدار کمامدارآتا علم اٹ اتے۔ خواجہ محمد آصف پارے کہ ہراسیکورٹی فورس آتا ہموڑے ساڑی گری ءِ اوفتے پاننگک کہ او داٹی نیام تمر، ای دا باندات آ ہیت کرسا ایوان ءِ رپورٹ کیوہ۔

(اے پی پی)