سریاب نا تعلیمی ادارہ غاتے کورونا وائرس نا قرنطینہ جوڑ کننگ سازش اسے‘یوسف وقار شاہوانی

کوئٹہ (آن لائن) جمعیت علما اسلام ضلع کوئٹہ نا راہشون صوبائی جنرل کونسل نا باسک ترجمان سریاب، رائٹرز گلڈ آف اسلام پاکستان بلوچستان نا صوبائی نائب صدر یوسف وقار شاہوانی پارینے کہ ساڑی حکومتی پالیسی تیان الس تنک مسنے۔ بلوچستان نا غریب الس کبینی و بے روزگاری ناسوب آن تینے تینٹ کسفنگ آبیوس ءِ۔ ساڑی حکومت تینا قول انا رد اٹ الس ءِ ریلیف رسیفنگ نا جاگہ غا الس آ رزق نا درگہ غاتے بند کننگ اٹی ءِ۔او پارے کہ کورونا وائرس اللہ تعالی ناکنڈآن ننے آ اسہ عذاب اسے ‘ توبہ کننگ کن ننے مسیت آتیا ہنوئی مریک ولے حکومت نا ہیبدار پالیسی و کورونا وائرس ناسوب آن مسیت آتے ٹی جماعت آ رکھ انا سوچ ءِ مسترد کینہ۔او پارے کہ سریاب نا تعلیمی ادارہ غاتے ٹی کورونا وائرس نا ناجوڑ آتیکن قرنطینہ جوڑ کننگ دا ناجوڑی ءِ پین تالان کننگ نا سازش اسے۔