سندھ اٹ لاک ڈاون نا اولیکو دے‘خلاف ورزی کننگ آ7 بندغ دزگیر

سکھر( آن لائن ) ملک اٹ ودک آ کورونا وائرس نا خلیس نا سوب آن سندھ حکومت تدوک آ دے مچ آ صوبہ ٹی پورو لاک ڈاون نا پڑو ءِ کریسس اوکان پد اینو اان لاک ڈاون آ عمل کننگ انگ ءِ۔ دا بابت اٹ حوال رسینگانے ہرانا رداٹ 7 ہندن ءُ بندغ ءِ دزگیر کننگانے ہرافک لاک ڈاون نا خلاف ورزی ءِ کرینو۔ پولیس حوالی نا پاننگ ئس کہ دزگیر مروک آ بندغ آتا تعلقداری سکھر آن ءِ۔ اوفتے آن 5 بندغ اسہ ہندی شاہراہ اسے آ اوار تولوک ئسر، اوفتے ہموکان دزگیر کننگانے وخت اس کہ ایلو اِرا بندغ ءِ اسہ گلی سے ٹی پیری کننگ آ خننگ تون دزگیر کننگانے۔ کراچی تون اوار مچ آ سندھ اٹ15 دے انا لاک ڈاون برجا ءِ۔ ہرانا رداٹ صوبہ نا دفترک، پبلک ٹرانسپورٹ و شاپنگ مال آتون اوار مچ آ اُلسی جاگہ غاک بند ءُ۔ یلہ انگا دکان تیٹی بیرہ میڈیکل اسٹور و کُن خور بہا کروک آ دکان اوار ءُ۔ وخت اس کہ وزیراعلی سندھ نا کنڈآن دا پڑو کننگاسس کہ بجلی، دیر، کیبل،ٹیلی کام و بینکنگ سروس آک برجا سلرہ، تانکہ اُلس ءِ زند ءِ گدریفنگ اٹ ہچ ءُ سختی اس دوئی مف۔ داڑان بیدس وزیراعلی سندھ نا کنڈآن بجلی و گیس والا کمپنی تیان پین خواست کریسس کہ اوفک اُلس آن اسہ تو اسے نا بل آتے الپ۔ انتئے کہ کورونا وائرس نا سوب آن بھاز زیات بندغ آتا کاروبار زہمی مریک۔ کمپنی تا کنڈآن دا بابت اٹ ہچ ءُ ورندی اس دوئی متنے۔ یات سلے کہ مچ آ ملک اٹ ہر گدرینگوک آ دے اتون اوار کورونا وائرس نا ناجوڑ آتیٹی ودکی بننگ ءِ۔ اوکان پد دا وخت اسکان مچ آ ملک اٹ داڑان زہمی آ بندغ آتا کچ 799 مس۔ وخت اس کہ 6 بندغ دا خطرناک آ وائرس نا گواچی مرسا تپاخت کرینو۔ دا حالیت آتے مون آ تخسا حکومت نا کنڈآن مچ آ ملک اٹ میڈیکل ایمرجنسی نافذ کننگانے۔ اوکان پد اُلس آن اُراتیٹی رہنگ انگ خواست کننگانے۔