بلوچستان حکومت نا 5 ہزار کمرہ والا ہسپتال اس جوڑ کننگ نا پڑو

کوئٹہ (آن لائن) چیف سیکرٹری بلوچستان فضیل اصغر پارینے کہ بلوچستان اٹ کورونا وائرس نا زہمی تا کچ 110 مسنے‘ گمانی حالیت آتون مون تننگ کن پین طبی گڑا ہلنگ انگ ءِ۔ کوئٹہ ٹی کور کمیٹی نا دیوان آن پد میڈیا تون ہیت وگپ کرسا چیف سیکرٹری بلوچستان فضیل اصغر پارے کہ کورونا وائرس داسکان بیرہ کوئٹہ ءِ زہمی کرینے‘ بلوچستان اٹ کوروناوائرس نا پین 2 کیس رپورٹ مسنو ہراکان گڈ بلوچستان اٹ کورونا وائرس آن زہمی بندغ آتا کچ 110 مسنے‘ وخت اس کہ اسہ زہمی بندغ زوال ہم مسنے۔ فضیل اصغر پارے کہ آخبت نا حالیت آتتون مون توننگ کن پین طبی گڑا ہلنگ انگ ءِ‘ پوسکن آ گڑاتا ہلنگ آن پد اسہ ہزار ناجوڑ ءِ سنبھالنگ مریک‘ وارڈ و آئسولیشن سینٹر آتے فعال کننگانے‘ اوپارے کہ حکومت بلوچستان لیبارٹری نا گڑا ہلنگ نافیصلہ کرینے‘ اگہ خاص ءُ کمیونٹی سے آن زیات کیس رپورٹ مننگ اٹی ءِ تو سروے ہم کننگک۔ چیف سیکرٹری پارے کہ سریاب روڈ آ ڈغار نا بست وبند کننگ انگ ءِ ہراٹی ہزار آن زیات بندغ تخنگ نا گنجائشت مریک‘ ہندا ڈغار آ ایف ڈبلیو او نا کمک اٹ اے فیبریکیٹڈ کمرہ ہم جوڑ کننگک‘ د ویلیج ہر وڑ انا آفت آتون مون تننگ کن کاریم اٹ بریک۔ اوپارے کہ تفتان اٹ ہم پین 5 ہزار کمرہ جوڑ کننگ انگ ءِ دا ڈٹ بروک آ 3 تُو اٹ پورو کننگک۔او خواست کرسا پارے کہ اگہ نن غٹ تینا اُراتے ٹی مرین تو دا وائرس چٹنگ کیک۔ المی وڑ اٹ رکھی گام گیج تینائی کننگے۔ ہرا زائر آت ٹیسٹ نیگٹو بسنے او ہم 2 تو اسکان خاص وڑ اٹ احتیاط کیر۔ نیگٹو بروک بندغ آتا سار سنبھال بھاز المی ءِ۔ او ڈاکٹر و پیرا میڈیکل اسٹاف ءِ خراج تحسین پیش کرسا پارے کہ حکومت آن خواست ءِ کہ اوفتے 2 تنخواہ تننگے۔ فضیل اصغر مستی پارے کہ دیہاڑی کروک مزور تتون حکومت کمک کیک‘ دا رد اٹ فلاحی تنظیمک ہم کمک کیر۔