پنجاب اٹ ہم لاک ڈاﺅن نا پڑو،مچ آ ملک اٹ فوج تعینات

اسلام آباد/ لاہور (آن لائن/ مانیٹرنگ ڈیسک) ملک اٹ کورونا وائرس نا تالانی ءِ توننگ نا کوشست آتا بابت دارالحکومت اسلام آباد تون اوار مچ آ ملک اٹ سول انتظامیہ نا کمک کن فوج بٹنگ انگانے، فوج ءِ آزاد کشمیر اٹی ہم تعینات کننگانے، ہراڑے او کورونا غان رکھ انا کوشست آتے کن حکومت تون کمک کیک۔ وزارت داخلہ نا کنڈ آن دوشنبے نا دے جاری کروک نوٹیفیکیشن نا رد اٹ سول انتظامیہ نا کمک کن پاکستانی فوج انا دست غاک تعینات کننگ انگ ءُ۔ نوٹیفیکیشن نا رد اٹ فوج ءِ آئین نا آرٹیکل 245 نا رد اٹ بٹنگ انگانے۔ وزارت داخلہ نا رد اٹ فوج سول انتظامیہ نا کمک کن تعینات نا خواست ءِ سول انتظامیہ کریسس۔ ایلو کنڈ آ پنجاب حکومت اینو آن 14 دے اکن لاک ڈاون نا فیصلہ کرینے۔ لاک ڈاون اٹی میڈیکل اسٹورک، کُن خور نا گڑاتا دکان یلہ مریرہ، وخت اس کہ شاپنگ مال آک بند مریرہ، فیصلہ کابینہ کمیٹی نا دیوان اٹ کننگا۔ حوال نا رداٹ وزیراعلٰی پنجاب عثمان بزدار کابینہ کمیٹی دیوان نا کماشی ءِ کرے ہراٹی پنجاب اٹ 14 دے اکن لاک ڈاون نا فیصلہ کننگانے۔ اوکان پد وزیراعلٰی پنجاب عثمان بزدار لاک ڈاون نا پڑو ءِ کرسا پارینے کہ اینو 24 مارچ سہب انا 9 بجہ غان 6 اپریل اسکان اُلی جاگہ ، بازار و شاپنگ مال آک بند مریرہ۔ سبزی منڈی و کریانہ اسٹورک یلہ مریرہ۔ موٹر سائیکل نا ڈبل سواری آ پابندی خلوک ءِ۔ ولدا ہم دادے پنجاب اٹ ہچ ءُ وڑ انا لاک ڈاون یا کرفیو اس تکنگپ۔ اُلس آن خواست ءِ کہ دا حالیت اٹ نما کمک نا خواہندار اُن۔ دا وخت اٹی میڈیکل اسٹورک، پٹرول پمپ و کُن خور نا گڑاتا دکانک یلہ مریرہ۔ پنجاب اٹ کوروناوائرس نا ناجوڑ آتا کچ 246 مسنے۔ ہندا سوب آن دیوان اٹ فیصلہ کننگانے کہ لاک ڈاون اکن سندھ ماڈل ءِ تینا کروئی تمک۔ دیوان اٹ دا فیصلہ ہم کننگانے کہ اگہ 14 دے اٹ کورونا وائرس آ کنٹرول کننگتو، تو لاک ڈاون اٹ ودکی کننگک۔ یات سلے کہ تدوک آ دے وزیراعلیٰ سندھ مراد علی شاہ نا پڑو آن پد سندھ اٹ مکمل لاک ڈاون برجا ءِ۔ مچ آ صوبہ ٹی 15 دے اکن لاک ڈاون کننگانے۔ اُلس ءِ بیدس گرج آن اُراتیان پیش تمننگ ناگرج اف۔ اسہ گاڈی سے ٹی ڈرائیور تون بیرہ اسہ بندغ اس سفر کننگ کیک، ہندن اگہ کس اس ہسپتال آ ہنوئی مریک تو گاڈی ٹی بیرہ مسہ بندغ ءِ ہننگ نا موکل مریک۔ اگہ کس اس کاریم اسے ٹی پیش تمے تو شناختی کارڈ ءِ تینتون تخے۔ یات سلے مچ آ ملک اٹ کورونا وائرس نا کیس آتا کچ 803 مسنے۔ ہرافتیٹی پنجاب اٹ 225، بلوچستان اٹ کچ 108،خیبرپختونخواہ31، اسلام آباد 15، سندھ 352، و گلگت اٹ 71، کشمیر اٹ کورونا ناجوڑ آتا کچ اسٹ اسے۔ سندھ اٹ کورونا وائرس نا تالانی و اوڑان بچفنگ کن برجا انگا اولیکو دے انا لاک ڈاﺅن اٹ مچ آ صوبہ نا کل ضلع غاتیٹی کراچی، حیدرآباد، سکھر و جیکب آباد اٹ پولیس و رینجر تا بھلو نفری اس گشت کننگ اٹی ءِ۔ وخت اس کہ ہر وڑ نا کاروباری اختئی معطل کننگانے او لاک ڈاون نا خلاف ورزی آ مچ آ صوبہ ٹی 113 بندغ دزگیر مسنو۔