مخالفت آتیان چَپ پاکستان جوڑ ہم مس، و شونہال ہم ارے، قریشی

سلام آباد( آن لائن ) وزیر خارجہ مخدوم شاہ محمود قریشی پارینے کہ 23 مارچ نا دے ننے ننا بہادر انگا باوہ پیرہ غاتا یات ءِ ایتک، ہرافک جتا ءُ ملک اسے نا جوڑ کننگ کن 1940 نا تاریخی قرارداد ءِ منظور کریر او اوکان پد ہفت سال اٹ آجوئی نا مزل ءِ دوئی کننگ اٹ سرسہب مسر۔ یوم پاکستان نا وخت آ تینا کلہو اسے ٹی او پارینے کہ قائداعظم محمد علی جناح نا بصیرت افروز کماشی ٹی دا مسخت نا دوئی کننگ کن عظیم ءُ قربانی تننگا او سختی تیا کنٹرول کننگا۔ او پارینے کہ مخالفت کروک آتا گمان تیان پیشن پاکستان نہ بیرہ داسکان قائم ودائم ءِ وخت اس کہ شونہالی نا کنڈآ ہم ہننگ اٹی ءِ۔ او پارینے کہ ہر سال 23 مارچ ننے وارخواہی ایتک کہ نن نیشن سٹیٹ نا وڑ اٹ تینا سفر نا جھلک اس نشان ایتن، تینا قومی آزموندہ غاتا بارواٹ جوان وڑ اٹ سجفنگے او جاچ ہلسا تینا آخبت نا بارواٹ گام گیج کننگے۔ نن اسہ بھلو مزل اس خلکنونن۔ ولے داسکان ننا مون آ بھلو مزل اس تمانے۔ شاہ محمود قریشی پارینے کہ پاکستان بیرہ اسہ علاقہ یا سیاسی جزو اسے نا پن اف وخت اس کہ دا اوفتے آن زیات اسہ نصب العین و نظریہ اسے نا پن ءِ۔ دا اسہ روح و اُست خوائی اسے نا تعبیر ءِ کہ ننے عظیم انگا دین نا بیان کروک آ انسانی قدر ءِ عملی جامہ اس بیرفے۔ او پارینے کہ جھیڑہ، ہوس و عدم مساوات آن پُر انگا دنیا ٹی اینو دا کلہو نا اخس کہ اہمیت و گرج ءِ، مننگ کیک داکان مست داخس الو۔ او پارینے کہ تاریخ اینو دو قومی نظریہ نا سچائی و حقانیت نا گواہی تننگ اٹی ءِ۔ بابائے قوم نا بصیرت ءِ اینو سلام پیش کرسا ننے تینا ہمو 80 لکھ آن زیات ایلم و ایڑ تے اسل اُست آن دروئی اف ہرافک بھارت نا کوزہ جموں وکشمیر ٹی کوزہ گیر بھارتی فوجی تا مون آ آجوئی نا دوئی کننگ کن سختی تا بہادری اٹ مقابلہ ءِ کننگ اٹی ءُ۔ تینا آہنی عزم، سیاسی وسفارتی و اخلاقی طاقت تون اوار حق استصواب رائے نا دوئی کننگ اسکان پاکستان تینا کشمیری ایلم تتون اوار سلوک ءِ۔