یوم پاکستان کورونا وائرس نا برخلاف جہد انا وڑ اٹ اڈ تننگا

اسلام آباد( آن لائن ) پاکستان دے انا رداٹ بنجائی اسمبلی نا اسپیکر اسد قیصر و ڈپٹی اسپیکر قاسم خان سوری قوم انا پن آ تینا جتا جتا کلہو آتیٹی پارینے کہ ملک انا شونداری و شونہالی کن کل ءِ اسٹی اٹ کاریم کننگ نا گرج ءِ۔ بنجائی اسمبلی ڈائریکٹریٹ جنرل آف میڈیا نا کنڈآن تدوک آ دے بیان اسے نا رداٹ او پارینو کہ پاکستان دے کورونا وائرس نا برخلاف جہد و کوشست نا وڑاٹ اڈ تننگ انگ ءِ۔ اوفک پاریر کہ دا وخت آ ملک ءِ جہانی دَین تینا گواچی کرینے۔ او پارینے جہانی دَین تون مون تننگ کن ننے 23 مارچ 1940 والا جوزہ نا گرج ءِ۔ اسپیکر قومی اسمبلی پارینے کہ 23 مارچ 2020 آ نن کرونا وائرس نا برخلاف جنگ انا وڑ اٹ اڈ تننگ اٹی اُن۔ اوفک پارینو کہ ملک اسہ سخت ءُ دور اسے آن گدرینگ انگ ءِ۔ ہرانا مقابلہ اسٹی و یکجہتی ٹی کننگک۔ اسد قیصر پارینے کہ 23 مارچ نا دے ننے دا قرارداد نا یات ءِ ایتک ہراٹی برصغیر نا مسلمانک اسہ جتا ءُ اسلامی فلاحی ریاست اسے نا بنداو ءِ تخار۔ تحریک پاکستان اٹ بشخ ہلوک آ مسلمان تا قربانی تے ہر وخت یات تخنگک۔ پاکستان دے اسہ پوسکن ءُ تجدید عہد انا دے اسے۔ ہرانا رداٹ دا جہانی دَین نا برخلاف کوشست کننگ کینہ۔ پاکستان نا کل سیاسی کماش آتے سیاسی اختلاف آتے اُست آن درسا قومی یکجہتی نا گرج ءِ۔ او پارینے کہ دا وخت آ مچ آ قوم ءِ کورونا وائرس آمبار انگا جہانی دَین نا مقابلہ ءِ کروئی ءِ۔ ملک انا کل سیاسی جماعت آتے اواری ٹی حکمت عملی اس تینا کننگ نا گرج ءِ۔ اسپیکر بنجائی اسمبلی پارینے کہ پاکستانی قوم ہر وخت ہر سختی نا جوان وڑاٹ مقابلہ ءِ کرینے او وطن عزیز کن ہر وڑ نا قربانی تننگ آن پدی متنے۔ سلہہ بند آ فوج آک و کانود نافذ کروک آ ادارہ غاک ملکی بقا نا خاطر اان بے کچ قربانی تسنو۔ او پارینے کہ ملک آ ہراتم کہ سخت ءُ وخت اس بریک تو ننا دفاعی ادارہ غاک ملکی سیاسی کماش آتتون مون پہ مون سلوک مسنو۔ اوفک پاک فضائیہ نا ہوا باز ونگ کمانڈر نعمان اکرم شہید ءِ خراج عقیدت پیش کرے۔ او پارینے کہ نعمان اکرم شہید ریہرسل نا وخت آ جہاز ءِ دوئی مروک آ شکست اٹی آبادی تے بچفسا عظیم ءُ کارنامہ اس سرانجام تس۔ او پارینے کہ جام شہادت نوش کروک آ ونگ کمانڈر نعمان اکرم نا قربانی تے ہر وخت یات تخنگک۔ او پارینے کہ تدوک آ ہشت تُو آن مقبوضہ کشمیر اٹ برجا انگا لاک ڈان نا سوب آن کشمیری اُلس نا حالت زار آ جہانی برادری نا ہوش ءِ دانگ کننگ نا گرج ءِ۔