کورونا وائرس تون اوار ہر چیلنج ءِ بے سہب کینہ، آرمی چیف

راولپنڈی (آن لائن) آرمی چیف جنرل قمر جاوید باجوہ پارینے کہ پاکستانی قوم ءِ کس اس ہم کٹنگ کپک، پاک فوج ملک انا خدمت و رکھ ءِ کرسا کیک۔ پاک فوج نا شعبہ تعلقات عامہ (آئی ایس پی آر) نا رداٹ آرمی چیف جنرل قمر جاوید باجوہ نا کماشی ٹی جی ایچ کیو ٹی اسپیشل کورکمانڈرکانفرنس مس۔ کورکمانڈر آک تیان تینا ہیڈکواٹر تیان وڈیوکانفرنس نا کمک اٹ بشخ ہلکر۔ آئی ایس پی آر پارینے کہ اسپیشل کورکمانڈرکانفرنس نا ون پوائنٹ ایجنڈا کورونا ئس۔ او وخت آ آرمی چیف پارینے کہ پاکستانی قوم ءِ کس اس ہم کٹنگ کپک، پاک فوج ملک انا خدمت و رکھ ءِ کرسا کیک۔ یات سلے آرمی چیف جنرل قمر جاوید باوجوہ پاک فوج ءِ سول انتظامیہ نا کمک ءِ ترند کننگ نا پارت کرسا پارینے کہ ہر بندغ اگہ تینے کرونا وائرس آن بچفے تو سمجنگے کہ دا اجتماعی رکھ انا بنداو ءِ۔ آرمی چیف مستی پارینے کہ ہر اسہ رکھوک آ گام اہمیت تخک۔ اولیکو اسہ ذموار ءُ شاری اس جوڑ مروئی تانکہ اجتماعی کہول آ کوشست آک سرسہب مننگ کیر۔ ہر پاکستانی نا فرض ءِ کہ حکومت و محکمہ جانجوڑی نا پارت آ عمل کننگے ہنداوڑ کننگ آن قومی کوشست آک سرسہب مریرہ۔ جنرل قمر جاوید باجوہ پارینے کہ ہچ ءُ خطرہ اس ذموار، پر عزم ءُ قوم اسے بے سہب کننگ کپک۔ دہنکہ چین کرے او نشان تس، ہر اسہ بندغ نا نظم و ضبط، اواری ٹی کمک ادارہ غاتا کوشست آتے اسٹ کیرہ ہنداڑتون قومی سرسہبی گنڈوک ءِ۔