کورونا وائرس نا سوب آن امریکہ ٹی مارشل لا خلنگ نا گمان

واشنگٹن( آن لائن )کورونا وائرس نا سوب آن امریکہ ٹی مارشل لاءخلنگ نا گمان ارے، برطانو ی میڈیا بھلو دعوی اس کرے، حوال نا رداٹ مچ آ دنیا ٹی کورونا وائرس آن تپاخت کروک آ بندغ آتا کچ 14ہزار 668 مسنے وخت اس کہ 3 لکھ38 ہزار آن زیات بندغ دا خطرناک آ وائرس آن زہمی مسنو۔ دا وخت اسکان کل 96958 بندغ جانجوڑ مسنو۔ وخت اس کہ 2 لکھ 18233 بندغ داسکان کن ہسپتال آتیٹی درمان کننگ انگ ءُ۔ ہرافتے آن 10298 بندغ نا حالیت خطرناک پاننگ انگ ءِ۔ امریکہ ٹی 452 بندغ تپاخت کرینو۔ وخت اس کہ زہمی آ بندغ آتا کچ 34ہزار آن گدرینگانے۔ اوکان پد برطانوی میڈیا دعوی کرینے کہ امریکی فوجی کماش آک کورونا وائرس نا توننگ کن جوان ءُ بست و بند نا ڈٹ بندی کرینے۔ برطانوی جریدے دعوی کرینے اگہ سیاسی کماش آک ہم کورونا وائرس نا گواچی مسر تو امریکہ ٹی مارشل لا خلنگک۔ کورونا وائرس نا سوب آن تدوک آ24 گھنٹہ ٹی کل آن زیات کہنگ اٹلی ٹی ریکارڈ کننگانے ہراڑے وائرس نا گواچی پین 651 بندغ تپاخت کرینو اوکان پد اٹلی ٹی کل کل آن زیات5476 مسنے۔ 5560 پوسکن آ کیس آک رپورٹ مسنو اوکان پد اٹلی ٹی زہمی آ ناجوڑ آتا کچ 59138 مسنے۔ اسپین اٹ وائرس نا گواچی 375 ایران اٹ 129، امریکہ ٹی 86، برطانیہ ٹی 48 و ہالینڈ اٹ 43 بندغ تپاخت کرینو۔ چین اٹ وائرس پین 6 بندغ نا جان ءِ ہلک۔ یات سلے کہ کورونا وائرس نا درمان نا مفننگ نا سوب آن مچ آ دنیا ٹی دا وائرس تالان مسنے۔ مچ آ دنیا نا سائنسدان آک ویکسئین نا تیاری ٹی لگانو۔ وخت اس کہ فرانس، امریکہ ، برطانیہ تون اوار ایلو ملک آتیٹی ساہدار و انسان تیان آزموندہ کننگ انگ ءِ۔