آپریشن ردالفتنہ 3،پنجگور‘سکیورٹی فورس آتا کارروائی‘ 4 دہشت گرد خلنگار

کوئٹہ، بلوچستان نا جتا جتا علاقہ غاتیٹی سیکورٹی فورس آتا دہشت گردی و کانود آن چَپ سربر آتا برخلاف کارروائیک برجا ءُ۔ سیکورٹی حوالی نا رِد اٹ پنجگور نا علاقہ اپھان کوہ، پروم اٹی کارروائی نا وخت آ فتنہ الہندوستان آن تعلقدار 4 دہشت گرد خلنگار‘ وخت اس کہ دشت میرانی اٹی انسانی اسمگلنگ نا کوشست ءِ بے سہب کرسا زالبول و چناتتون اوار 58 کانود آن اوغان باتی تے دزگیر کننگا۔ سیکورٹی حوالی نا رِد اٹ سیکورٹی فورس آک آپریشن ردالفتنہ 3 نا رِد اٹ پنجگور نا علاقہ اپھان کوہ، پروم اٹی دہشت گرد آتا ساڑی مننگ نا حوال آ کارروائی کریر۔ کارروائی نا وخت آ سیکورٹی فورس و علاقہ ٹی ساڑی دہشت گرد آتا نیام اٹی بھاز سم کاری ہم مس۔ حوالی نا رد اٹ سم کاری ٹی فتنہ الہندوستان نا 4 دہشت گرد خلنگار وخت اس کہ خلنگوک دہشت گرد آتیان بھلو کچ اسے ٹی پوسکنوڑ سلہہ و منچر دوئی کننگا۔ سیکورٹی حوالی نا رِد اٹ دہشت گرد آتا برخلاف کارروائیک برجا ءُ و علاقہ ٹی کلیئرنس آپریشن ہم کننگ انگ ءِ‘ ایلو کارروائی ٹی سیکورٹی فورس آک بلوچستان نا علاقہ دشت میرانی ٹی وخت آ کارروائی کرسا زالبول و چناتتون اوار 58 کانود آن چَپ اوغان باتی تے دزگیر کریر‘ سیکورٹی حوالی نا رِد اٹ دزگیر بندغ آک انسانی اسمگلر آتا کمک اٹ پاکستان نا کسر اٹ ایران و اوکان پد یورپ آ ہننگ نا کوشست کننگ ئسر۔ کمامدار آتا رِد اٹ دزگیر اوغان باتی تے مستی کارروائی کن تعلقدار پولیس کمامدار آتے تننگانے‘ سیکورٹی حوالی نا رد اٹ سیمی علاقہ غاتیٹی انسانی اسمگلنگ و کانود آن چَپ سربر نا توننگ کن گام گیج آتا ریسہ برجاءِ‘ وخت اس کہ سیکورٹی فورس آک سیمی علاقہ غاتیٹی کانود نا عملداری ءِ پک کننگ کن کارروائی کننگ اٹیءُ۔ داکان بیدس وزیراعلیٰ بلوچستان میر سرفراز بگٹی پنجگور نا علاقہ اپھان کوہ، پروم اٹی سیکورٹی فورس آتا سرسہب کارروائی آ اوفتے خراجِ تحسین پیش کرینے، وزیراعلیٰ پارے کہ آپریشن ردالفتنہ 3 نا رِد اٹ بلوچستان اٹی دہشت گرد آتا برخلاف سیکورٹی فورس آتا کارروائیک برجا ءُ۔ پنجگور نا علاقہ اپھان کوہ، پروم اٹی فتنہ الہندوستان نا دہشت گرد آتا ساڑی مننگ نا حوال آ سیکورٹی فورس آک کارروائی کریر ہرانا سوب آن چار دہشت گرد خلنگار‘ کارروائی ٹی خلنگوک دہشت گرد آتیان بھلو کچ اسے سلہہ و منچر ہم دوئی کننگا۔ وزیراعلیٰ میر سرفراز بگٹی پارے کہ سیکورٹی فورس آک دہشت گردی نا برخلاف جنگ اٹی بھاز قربانک تسنو، قوم ءِ تینا بہادر آ سیکورٹی فورس آتیا گمر ءِ‘ او پارے کہ دہشت گردی نا پورو چٹفنگ اسکان کارروائیک برجا سلرہ، ریاست نا دشمن تا برخلاف زیرو ٹالرنس نا پالیسی آ عمل کننگ انگ ءِ۔ امن و سوگوی کن سیکورٹی فورس آتا کوشست آک ستا کڑزرہ۔