وزیرخزانہ میر شعیب نوشیروانی، بی آر اے نا ریونیو بیس ءِ ودفنگ و ٹیکس نیٹ ءِ تالان کننگ کن گام گیج آتا منظوری

کوئٹہ، صوبائی وزیر خزانہ و معدنیات میر شعیب نوشیروانی نا کماشی ٹی بلوچستان ریونیو اتھارٹی (BRA) نا کارکڑد، ٹیکس ہلنگ اٹ گچینی و ریونیو بیس ءِ شون تننگ نا نا بابت اہم ءُ دیوان اس اڈ ہلک، دیوان اٹی سیکرٹری خزانہ جہانگیر کاکڑ، چیئرمین بلوچستان ریونیو اتھارٹی عبداللہ خان و ایلو تعلقدار کمامدار آک بشخ ہلکر۔ دیوان اٹی تدوک آ دیوان اٹی کننگوک فیصلہ و اوفتیا مروک پیشرفت نا جم جاچ ءِ ہلنگا۔ دیوان اٹی فیصلہ کننگا کہ کمپنی، ہوٹل، ہسپتال و ایلو جتا جتا بشخ آتا آڈٹ نا عمل ءِ پین ترند، بھرمی و شفاف جوڑ کننگک، تاکہ ٹیکس نظام اٹی شفافیت ءِ پک کرسا صوبائی ریونیو ٹی ودکی کننگ مرے، دا وخت آ پاننگا کہ گوادر اٹی بلوچستان ریونیو اتھارٹی نا دفتر ءِ فعال کننگانے، ہراڑان گوادر و ایب کیب اٹی ٹیکس اتون تعلقدار باندات نا چاروکی و ٹیکس تروک آتے خذمت آتا فراوانی ٹی پین گچینی بریک۔ داکان بیدس بیدس جیولرز، بیکری، پراپرٹی ڈیلر، کار شورومز، دیر فراوان کروک کمپنی و ایلو تعلقدار واپاری بشخ آتے بلوچستان ریونیو اتھارٹی نا ٹیکس دنگ اٹ اتنگ نا فیصلہ ہم کننگا۔ یوٹیوبرز و آن لائن کاروبار تون تعلقدار بندغ و ادارہ غاتے ہم کانودی خواست آتا رد اٹ اٹ بلوچستان ریونیو اتھارٹی نا ٹیکس دنگ اٹ اوار کننگ کن گام گیج آتے ترند کننگ آ امنائی مس۔ صوبائی وزیر خزانہ میر شعیب نوشیروانی دیوان آن تران کرسا پارے کہ بلوچستان اٹی ٹیکس نیٹ ءِ تالان کننگ، ٹیکس ہلنگ نا نظام ءِ شفاف جوڑ کننگ و واپاری سرجز آتے کاغذی دروشم تننگ حکومت نا اولیت آتیٹی اوار ءِ‘ او تعلقدار کمامدار آتے پارت کرے کہ ٹیکس کانود آتیا عملدرآمد تون اوار ٹیکس تروک آتے آسراتی تا فراوانی ءِ ہم پک کننگے۔ او پارے کہ پوسکن آ واپاری وڑ و آن لائن زرگزران ءِ ہم ٹیکس نظام نا بشخ جوڑ کننگ وخت انا اہم ءُ گرج اسے، وخت اس کہ کل گام گیج آک کانود و شفافیت نا اصول آتا رِد اٹ کننگر۔ دیوان اٹی بلوچستان ریونیو اتھارٹی نا کارکڑد ءِ پین گچین کننگ و صوبائی کٹیا ٹیودکی کن چندی سلاہ تیا ہم سجفنگا۔