منی لانڈرنگ نا توننگ کن کانود اٹ ترمیم نا منظوری

اسلام آباد (آن لائن) بنجائی وزیر حوالکار و شینکاری سینیٹر شبلی فراز پارینے کہ بنجائی کابینہ ٹی وی لائسنس فیس اٹ ودکی نا ویل ءِ رد کرے، تحریک انصاف حکومت اُلسی نمائندہ غاتا جائیداد آتے ڈکلئیر کرسا تاریخ اس رقم کرینے۔ وزیراعظم میڈیا نا بقایا جات آتا ادا مفننگ آ اُست ہسونی نا درشانی ءِ کرینے و ہمو وزیر تے پرمان کرینے کہ او اسہ ہفتہ سے ٹی میڈیا بقایاجات آتے ادا کےر۔ دا خیال آتا درشانی ءِ او تدوک آ دے وزیر اعظم عمران خان نا کماشی ٹی کابینہ دیوان آن پد میڈیا ءِ بریفنگ ترسا کرے۔ بنجائی وزیر حوالکاری پارینے کہ پاکستان ٹیلی ویژن اسہ ادارہ اسے و دا پاکستان نا توار ءِ، مالو نا حکومت آک داٹی سیاسی بنداو آتیا بھرتی کرسا دادے بھس کریسُر، ساڑی حکومت دادے تینا نَت تیا سلنگ کن منہ بنداوی ءُ گام گیج کریسُس۔ بھس انگا ادارہ غاتے نت تیا سلفنگ کن پیسہ نا گرج مریک۔ ہندا سوب آن حکومت صارف آتے بجلی نا بل آتیٹی اوار ٹی وی لائسنس نا فیس ءِ ودفسا 35روپئی آن 100روپئی کریسُس ولے اُلسی ویل آتے خنسا دا فیصلہ ءِ رد کرینے۔ او پارینے کہ نُت انا نہاد آتیٹی ودکی نا بابت وزیراعظم ہمو وزیر تیان ہرفے او نُت انا نہاد آتیٹی بریبری اتنگ نا پارت کرے۔ شبلی فراز پارینے کہ حکومت نا کوشست ءِ کہ نُت انا نہاد زیات مف، خولم آتے وخت آ تننگ و دانا بشخ و پانٹ اٹ ہچ ءُ سختی اس مف، خواست و بشخ وپانٹ اٹ فرق ءِ ایسر کننگ کن پرائیویٹ و حکومتی ادارہ غاک درآمد کننگ کیرہ۔