فوجی عدالتوں آتیان سزاکنوک 196 ڈاہدار تا یلہ کننگ نا حکم معطل

اسلام آباد( آن لائن) سپریم کورٹ 196ڈاہدار تا یلہ کننگ نا پشاور ہائیکورٹ نا حکم ءِ معطل کرینے۔ جسٹس مشیرعالم نا کماشی ٹی 3 باسکی بنچ بنجاہ نا درخواست آ سماعت کرے۔ سپریم کورٹ فریقین آتے نوٹس جاری کرسا بنجائی حکومت آن ڈوہدار آتا مقدمہ غاتا تفصیل آتے بٹنگانے۔ سماعت نا وخت آ جسٹس قاضی امین ریمارکس تس فوجی عدالت آتیان ٹرائل آن پد ڈوہدار آتے سزا مس، ہر کیس انا تینا شاہدی و راستکیک ءُ، عدالت استفسار کرے کہ مگہ ڈوہدار آک یلہ کننگ نا فیصلہ غان پد جیل آتیٹی ءُ؟ ایڈیشنل اٹارنی جنرل سپریم کورٹ ءِ معلومدار کرے کہ ڈوہدار آتے داسکان کن یلہ کننگتنے۔ ایڈیشنل اٹارنی جنرل پشاور ہائی کورٹ نا فیصلہ ءِ معطل کننگ نا استدعا کرے۔ عدالت عظمی پشاور ہائی کورٹ نا اِرا باسکی بنچ نا فیصلہ ءِ معطل کرسا فریق آتے نوٹس جاری کرے وخت اس کہ ڈوہدار آتا کل ریکارڈ آتے بٹنگا۔ مستی سماعت ءِ جمعہ اسکان ملتوی کننگا۔ یات سلے کہ جون2020 ٹی پشاور ہائی کورٹ فوجی عدالت آتا کنڈآن جتاجتا دوبہ غاتا رداٹ سزا تا برخلاف دائر اپیل آ فیصلہ بنفسا 196 بندغ آتا سزا تے کالعدم کرینے و مستی سد آن زیات مقدمہ غاتا ریکارڈ ءِ بٹنگ انگاسُس۔ چیف جسٹس پشاور ہائی کورٹ جسٹس وقار احمد سیٹھ و جسٹس نعیم انور استا بینچ 300 آن زیات درخواست آتیا سماعت کریسُس۔