ساڑی حالیت اٹ بلوچستان نا اقلیتی برادری تینے بے رکھ تکنگ ءِ، آغا حسن

کوئٹہ ( آن لائن )بلوچستان نیشنل پارٹی نا باسک و قومی اسمبلی وبنجائی سیکرٹری حوالکاری آغا حسن بلوچ وڈھ اٹ بخال واپار و خاران اٹ عبدالخالق بلوچ و عبدالرشید بلوچ نا خونی تا دزگیری و اقلیت آتے رکھ تننگ نا خواست کرسا پارینے کہ اقلیتی برادری بلوچستان اٹ کیہی دہائی تا سے کاروبار نا بشخ تون گنڈوک ءُ، ولے اینو اوفک تینے بے رکھ سمجھنگ اٹی ءُ، صوبائی حکومت و ارباب اختیار نا زمواری ءِ کہ اوفک دا دوبہ دار آ بندغ آتے زوت اس دزگیر کیر۔ دا خیال آتا درشانی ءِ او قومی اسمبلی اٹ پوائنٹ آف آرڈر آ تینا خیال آتا درشانی ءِ کرسا کرے۔ آغا حسن بلوچ پارینے کہ وڈھ اٹ بخال تاجر و خاران اٹ عبدالخالق بلوچ و عبدالرشید بلوچ نا خونی تے دزگیر کننگے، دوبہ غاتے ٹی اختہ انگا بندغ آتا دزگیری آن حالیت آک گڑاس سے نا گڑاس جوان مریرہ او ڈپٹی اسپیکر ءِ پارے کہ اقلیتی برادری بلوچستان ٹی کیہی دہائی تا سے کاروبار تون گنڈوک ءُ، ولے اینو اوفک تینے بے رکھ تکنگ اٹی ءُ، صوبائی حکومت و ارباب اختیار نا زمواری ءِ کہ اوفک دا دوبہ دار آ بندغ آتے زوت اس دزگیر کے، او خواست کرینے کہ کوئٹہ ،وڈھ ،پجگور،تربت،واشک نا واقعہ غاتا بابت تفصیلی ءُ رپورٹ اس بٹنگ انگے او اختہ انگا بندغ آتے سزا تننگے۔ ہراڑا ڈپٹی اسپیکرقاسم خان سوری پارینے کہ پاکستان اٹ رہنگوک آ اقلیت آتے کل شاری تا بریبر ءُ ای سمجھوہ کہ کل اقلیت آتے رکھ تننگ حکومت وخت انا زمواری ءِ خواست کیوہ کہ زوت اس کل خونی تے دزگیر کننگے۔