آگہی مہم نا کمک اٹ دترتروک آتا کچ ءِ اِراہنداخہ کننگانے، ابرارالحق

اسلام آباد (اے پی پی) پاکستان ریڈ کریسنٹ سوسائٹی نا چیئرمین پنی آ گلوکار و راجی کارندہ ابرارالحق پارینے کہ اوادارہ ٹی انقلابی بدلی ایسونے و دمدستی وڑاٹ اِرا پوسکن ءُ بشخ ٹہیفینے، ہراٹی ریسورس موبلائزیشن و سوشل میڈیا ڈیپارٹمنٹ اوار ءُ، ریسورس موبلائزیشن نا کمک اٹ اِراتُو اٹی 15 کروڑ روپئی مچ کرین، آگہی مہم نا کمک اٹ دتر تروک آتا کچ ءِ اِراہنداخہ کرین۔ اے پی پی ءِ تروک آ خصوصی انٹرویو ٹی ابرارالحق پارے کہ او محافظ ٹیم اس جوڑ کرینے ہرا محافظ ایپ ءِ درستی راستی کرفے ہرانا رداٹ 5 لکھ مخلوق اسکان رسینگ گیگ دوئی کرے۔ ہرافتے ٹی بھلو کچ اسے ٹی سخی تا کمک اٹ مخلوق اٹ کُن و خور بشخنگا و اوفتے کورونا نا بابت المی معلومداری ہم فراوان کننگا و داہلوک آ دین آن بچنگ کن رکھی گام گیج آتیان معلومدار کننگا۔ داکان بیدس مچ آ ملک آن حساب وکتاب ءِ مچ کننگا، ہاٹ سپاٹ ایریہ غاتا پیدواری ءِ کننگا ہندا ہمو علاقہ غاک ئسر ہرافتے گڈسر اٹ لاک ڈاون کروئی تما۔ داعلاقہ غاتیٹی مخلوق ءِ ہروڑنا امداد فراوان کرین۔ 10 ہزار خاہوت آتے 48 ہزار فی خاہوت تننگک ہرانا اولیکو مرحلہ ٹی 2500 خاہوت آتے تننگ اُن۔ دافتے ٹی معذور بندغ، مزور، فنکار، پیرامیڈیکل اسٹاف، صحافی و ہوٹل و برامی ہال آتیٹی کاریم کروک آ مخلوق اوار ءِ۔