پنجاب گچین کاری، بنجائی حکومت نا فیصلہ نا اول سر جاچ نا خواست

اسلام آباد : پنجاب اٹ گچین کاری کرفنگ نا فیصلہ نابرخلاف الیکشن کمیشن نا اولسرجاچ درخواست اٹ نگران پنجاب حکومت وبنجائی حکومت سپریم کورٹ اٹ ورندی جمع کرفینو۔ بنجائی حکومت پنجاب اٹ 14 مئی آ گچین کاری تا فیصلہ غا اولسر جاچ انا خواست کرینے‘ بنجائی حکومت تینا ورندی ٹی پارے کہ آجو و شفاف گچین کاری کرفنگ نا آئینی زمواری الیکشن کمیشن ناءِ‘ سپریم کورٹ تینٹ تاریخ ترسا الیکشن کمیشن نا واک ءِ بے اثر کرینے‘ پنجاب اٹ گچین کاری مہالو مسر تو قومی اسمبلی نا گچین کاری تا زہمی مننگ نا گڑتی ارے۔ بنجائی حکومت پارینے کہ پنجاب اٹ نشست آک کل آن زیات ءُ‘ پنجاب اٹ کٹنگ آن پد دا پک مریک کہ بنجا ٹی حکومت دیر کیک۔ پنجاب اٹ گچین کاریک قومی اسمبلی نا گچین کاری تتون اسہ دے آ بایدے مریر‘ سپریم کورٹ تینا 4 اپریل نا فیصلہ نا اولسر جاچ ءِ ہلے۔ سپریم کورٹ پنجاب اٹ گچین کاری تا تاریخ ترسا الیکشن کمیشن نا واکداری تے کاریم اٹ ایس۔ ایلو کنڈآ نگران پنجاب حکومت ہم 14مئی نا گچین کاری تابابت کیس اٹ تینا ورندی ءِ سپریم کورٹ اٹ جمع کرفینے۔ پنجاب اٹ 14مئی نا گچین کاری تا بابت کیس اٹ چیف سیکرٹری پنجاب نا کنڈآن سپریم کورٹ اٹ ورندی جمع کرفنگانے‘ ہراٹی پاننگانے کہ گچین کاری تا تاریخ تننگ نا واکداری سپریم کورٹ تون اف‘ نگران پنجاب حکومت صوبہ ٹی دمدستی گچین کاری تا مخالفت ءِ کرسا پارے کہ گچین کاری تا تاریخ تننگ نا واک ریاست نا ایلو ادارہ غاتتون ءِ‘ 14 مئی آ گچین کاری تا تاریخ ترسا واکداری تا آئینی بشخ وپانٹ نا خلاف ورزی مسنے‘ آرٹیکل 218 نا رد اٹ ساف شفاف گچین کاری کرفنگ الیکشن کمیشن ناواکداری ءِ‘ واکداری تا بشخنگ نا رد اٹ سپریم کورٹ خیبرپختونخوا ٹی گچین کاری تا تاریخ تتو۔ نگران پنجاب حکومت پارینے کہ گچین کاری پروگرام اٹ بدلی کننگ ناواکداری الیکشن کمیشن تون ءِ‘ 9 مئی نا واقعہ غاتیان گڈ صوبہ ٹی سکیورٹی حالیت آک بدل مسنو‘ عمران خان نا دزگیری آن پد سول ملٹری ملکیت آتے نسخان رسیفنگا‘ عمران خان نا دزگیزی آن پد بیدادی آساڑی برانز کننگا‘ برانز آتے ٹی 162 پولیس کارندہ ٹھپی مسر و 97 پولیس گاڈی تے خاخر تننگا۔ نگران پنجاب حکومت پارینے کہ پنجاب اٹ گچین کاری تیکن 5 لکھ 54 ہزار سکیورٹی کارندہ درکار مریرہ۔ داوخت آ گچین کاری مسر تو بیرہ 77 ہزار کارندہ ساڑی مریرہ۔

(مانیٹرنگ ڈیسک)