بلوچستان نا شونداری ننا اولیت آتیٹی اوار ءِ، شہباز شریف
اسہ ہفتہ ٹی صوبہ نا ارٹمیکو وار دورہ ءِ کننگ اُٹ، نوکاپ اٹی بلوچستان نا الس نا اولیتی بنداو آ کمک و بحالی ءِ پک کرین،لائخ آ بندغ آتے اسہ وڑ شونداری نا وارخواہی و روزگار نا فراوانی اسکان آسرات تولپرہ
Get real time updates directly on you device, subscribe now.
اسلام آباد: وزیراعظم محمد شہباز شریف تون گورنر بلوچستان ملک عبدالولی کاکڑ گورنر ہاؤس کوئٹہ ٹی اوڑدہی کرے۔ دوشنبے نادے آ وزیراعظم آفس نا میڈیا ونگ آن جاری بیان نا رداٹ اوڑدہی ٹی گورنر بلوچستان وزیراعظم نا بلوچستان نا شونداری ٹی خاص است خواہی آ اودے خراج تحسین پیش کرے۔ گورنر بلوچستان وزیراعظم ءِ صوبہ ٹی برجا شونداری ڈٹ و امن و ایمنی نا حالیت آتا بابت سرجمی اٹ معلومدار کرے۔ داکان مست وزیراعظم محمد شہباز شریف اسہ دے ئی دورہ غا کوئٹہ غا سرمس۔ وزیراعظم آفس میڈیا ونگ آن جاری بیان نا رداٹ کوئٹہ غا سرمننگ آ گورنر بلوچستان ملک عبدالولی کاکڑ و وزیراعلیٰ بلوچستان عبدالقدوس بزنجو ئسک وزیراعظم ءِ بخیر کریر۔ داکان بیدس وزیراعظم محمد شہباز شریف تون بلوچستان آن پاکستان مسلم لیگ (ن) نا سرکڑدہ غاک اوڑدہی کرینو۔ دوشنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم نا اسہ دے ئی دورہ کوئٹہ نا وخت آ اوڑتون بلوچستان آن پاکستان مسلم لیگ (ن) نا سرکڑدہ غاک اوڑدہی کرینو، اوڑدہی ٹی صوبہ نا سیاسی حالیت و پارٹی نا امور آ گپ وتران کرسا وزیراعظم شہباز شریف پارے کہ قائد میاں محمد نواز شریف نا کنڈآن نمے غٹ ءِ پارٹی راہشون آتے سلام و سینئر نائب صدر مریم نواز، حمزہ شہباز و پارٹی نا سینئر سرکڑدہ غاتا کنڈآن بلوچستان نا مسلم لیگی باسک آتیکن نیک است خواہی پیش کینہ۔ وزیراعظم پارے کہ بلوچستان نا شونداری و شونہالی حکومت نا اولیت ءِ، ہندا اسہ ہفتہ ٹی دا کنا بلوچستان ءِ ارٹ میکو دورہ ءِ، نوکاپ اٹی بلوچستان نا الس ءِ اولیتی بنداو تیا کمک و اوفتا بحالی ءِ پک کرین۔ اوپارے کہ لائخ آ بندغ آتے اسہ وڑ شونداری نا وارخواہی و روزگار نا فراوانی اسکان آسرات تولپرہ، بلوچستان نا مخلوق نا محرومی تے مر کننگ کن دے و نن خواری کننگ اٹی اُٹ۔ نوکاپ اٹی مسلم لیگ (ن) نا بلوچستان نا باسک آک کمکی سرجزآتیٹی زیات آن زیات بشخ ہلکر۔ نوکاپ زہمی تا ڈکھیائی تیا مالم تخنگ آ کنتون اوار مچ آ مرکزی سرکڑدہ غاک نمے غٹ انا کوشست آتے خراج تحسین پیش کیرہ۔
(اے پی پی)