آڈیو لیکس جاست پاست نا اولیکو دیوان، کارروائی ءِ پبلک کننگ نا پڑو

اسلام آباد : آڈیو لیکس ناجاست پاست کروک جوڈیشل کمیشن تینا سیکرٹریٹ ءِ سپریم کورٹ اٹ جوڑ کرے وخت اس کہ کمیشن اٹارنی جنرل پاکستان آن کل آڈیو تا ٹرانسکرپٹ و کل بندغ آتا پن‘ پتہ و رابطہ نمبر آتے پگہ چار شنبے نادے بٹنگا‘ جوڈیشل کمیشن کارروائی ءِ پبلک کننگ ناپڑو ہم کرے‘ جسٹس قاضی فائز عیسیٰ ناکماشی ٹی سپریم کورٹ نا کمرہ عدالت نمبر7 اٹ آڈیولیکس جاست پاست نا اولیکو دیوان اڈہلک‘ کمیشن اٹ چیف جسٹس اسلام آباد ہائیکورٹ جسٹس عامرفاروق و چیف جسٹس بلوچستان ہائیکورٹ نعیم اختر افغان بشخ ہلکر‘ اٹارنی جنرل منصور عثمان اعوان ہم پیش مس‘دیوان نابنا ٹی اٹارنی جنرل کمیشن ٹی او آر ءِ خوانفسا بنفے‘ کمیشن نا سروک جسٹس قاضی فائز عیسیٰ پارے کہ حکومت ہرا کانود نارد اٹ کمیشن ٹہیفے؟ اٹارنی جنرل پارے کہ کمیشن انکوائری کمیشن ایکٹ 2016 نا رد اٹ ٹہیفنگانے، جسٹس قاضی فائز عیسیٰ پارے کہ سپریم کورٹ نا سینئر آ جج مننگ نا سوب آن کنا گڑاس آئینی فرض ہم اریر‘ ای سپریم جوڈیشل کونسل نا باسک ہم اریٹ‘ ننے آ بھلو باریم اسے‘،جوڈیشل کمیشن اٹ پیش کروک آک دوبہ دار افس‘ کل پیش مروک آتے شرف تننگک‘ خوانہ کہ کمیشن زوت تینا کارروائی ءِ پورو کے‘ حساس ءُ باندات اس مون آ بس تو ان کیمرہ کارروائی نا درخواست نا جائزہ ءِ ہلینہ‘ کمیشن نا کارروائی سپریم کورٹ اسلام آباد بلڈنگ اٹ مریک۔ کمیشن نا سروک مستی پارے کہ ہرافتیان انکوائری کروئی ءِ اوفتے ٹی 2بھلو وئی انا نیاڑی ہم اریر‘ا گہ درخواست بس تو کمیشن کارروائی کننگ کن لاہور آ ہم ہننگ کیک‘ بیرہ منہ بزرگ نیاڑی تا بیان ہلنگ کن مننگ کیک لاہور آ کان‘ اٹارنی جنرل ءِ کمیشن کن اینو موبائل فون و سم فراوان کننگ نا پرمان کرے‘ جوڈیشل کمیشن کن فراوان کروک فون نمبر ءِ پبلک کننگک‘ جسٹس قاضی فائز عیسیٰ انکوائری کمیشن نا واکداری دنگ ءِ پیدوار کرسا پارے کہ انکوائری کمیشن سپریم جوڈیشل کونسل نا اف‘ ننا مون آ پیش مروک آتے دوبہ دار تکنگپک‘ اینو جوڈیشل کمیشن نا سیکرٹری ناپن ءِ فائنل کرسا پاننگک‘ کوشست کننگک کہ مینڈیٹ نا رد اٹ کاروائی ءِ پورو کننگے‘ جوڈیشل کمیشن مستی کارروائی ءِ 27 مئی اسکان پد بٹے۔

(آن لائن)