پوسکن آ بجٹ کن کل تعلقدار آتتون سلاہ کننگک، اسحاق ڈار

اسلام آباد: بنجائی وزیر خزانہ و محصولات سینیٹر محمد اسحاق ڈار تون دوشنبے نادے آ داڑے انسٹی ٹیوٹ آف چارٹر ڈ اکاؤنٹنٹس آف پاکستان نا صدر محمد علی لطیف اوڑدہی کرے۔ اوڑدہی ٹی تین پہ تینی است خواہی نا امور تیا گپ وتران مس۔ انسٹی ٹیوٹ نا صدر داوخت آ پوسکن آ مالی سال انا بنجائی بجٹ کن انسٹی ٹیوٹ نا کنڈآن تیار کروک بجٹ سلاہ و سلاہ و سوج آتے پیش کرے۔ وزیرخزانہ داوخت آ پارے کہ پوسکن آ مالی سال انا بنجائی بجٹ اٹی پوریاگر، کاروباری، زرکار آتون اوار چندی بشخ آتیان سلاہ بٹنگانے۔ اوپادرے کہ حکومت زرگزران نا گچینی و پائیدار نموکن پوریاگر و زرکارآتا بجٹ سلاہ تا جاچ ءِ ہلیک۔ داکان بیدس اسپیکر قومی اسمبلی راجہ پرویز اشرف تون بنجائی وزیر خزانہ اسحاق ڈار دوشنبے نادے آ پارلیمنٹ ہاؤس اٹی اوڑدہی کرے ہراٹی ملک انا جم زرگزرانی و سیاسی حالیت آتیا گپ وتران کننگا۔ اسپیکر قومی اسمبلی زرگزرانی سوگوی کن وزیر خزانہ و اونا ٹیم انا کوشست آتا ستاءِ کرے و پارے کہ زرگزرانی سوگوی کن سیاسی سوگوی المی ءِ۔ ملکی شونداری کن زرگزران نا سوگوی المی ءِ۔ ساڑی آ سیوتی حکومت نا کنڈآن زرگزرانی مشکل آتیان پد ہم پیٹرولیم مصنوعات آتا نہاد آتیٹی کمتی جوان ءُ گام اسے۔ بنجائی وزیر خزانہ اسحاق ڈار اسپیکر قومی اسمبلی نا کنڈآن ساڑی زرگزرانی ٹیم اکن سفتی ہیت آتیا منت واری ءِ ہرفے و پارے کہ ساڑی حکومت ءِ زرگزرانی مشکل آک میرات اٹی ملانو۔ بروک آ مالی سال انا بجٹ اٹی الس ءِ ریلیف فراوان کننگ کن ہرممکن گام گیج کننگک۔ ساڑی زرگزرانی ٹیم ملکی زرگزران ءِ شونداری نا کنڈآ دننگ کن دے و نن لگوک ءِ۔

(اے پی پی)