لاک ڈاﺅن کننگ کپنہ،عمران خان

اسلام آباد(آ ن لائن) وزیر اعظم عمران خان قوم آن تران اٹ اسہ وار ولدا لاک ڈاﺅن کپننگ نا فیصلہ کرینے۔ وخت اس کہ وزیر اعلیٰ سندھ تیان ویڈیو بیان اسے ٹی سندھ اٹ لاک ڈاﺅن کننگ نا پڑو کرینے۔ سرجم حوال آتا رِد اٹ وزیر اعظم عمران خان اسہ وار ولدا پارینے کہ ملک اٹ لاک ڈاﺅن کننگ نا بحث چلینگ انگ ئِ، دا بابت اٹ ای گڑاس پاننگ خواوہ کہ دانا مطلب ملک اٹ کرفیو خلنگ ئِ۔ قوم آن تران کرسا وزیراعظم پارینے کہ ای دہن کننگ کیوہ ولے ننا ویل دادے کہ 25 درسد پاکستانی غریبی ٹی زند ءِ تدیفنگ اٹی ءُ۔ وخت اس کہ اوفتتون داخس وسیلہ اف کہ اوفک اِرا وہفتہ اسکان تینا چناتا گزران ءِ کننگ کیر۔ او پارینے ننتون ہم داخس وسیلہ اف کہ نن اُلس نا اُرا تسکان ارغ سر کننگ کین۔ وزیراعظم مستی پارینے کہ اُلس آن خواست ءِ کہ اوفک تینٹ تینا اُراتیٹی رہنگر، نن خننگ اُن کہ نن تینا کاروبار اکن انت انت کننگ کینہ۔ او پارینے کہ کہ کُن خور نا فکر کننگ نا گرج اف، ننتون بھاز مڈی ارے، وخت اس کہ کورونا وائرس آن زیات خلیس ننے ہڑدھڑ آن ئِ۔ او پارینے کہ کل اگہ اُرا ٹی گڑا مچ کننگ ءِ بنا کیرہ تو داڑان راج ءِ نسخان رسینگک۔ وزیراعظم پارینے کہ اُلس حکومت آ پت کے نن دا سخت انگا وخت آن پیشتمنہ۔ او مستی پارینے کہ ای او کنا مچ آ ٹیم نا سجفنگ کورونا وائرس تون ئِ۔ میڈیا ذمواری نا درشانی ءِ کرسا ہڑدھڑ آن بچفنگ کن کڑد ادا کے۔ عمران خان پارینے کہ اگہ ننا حالیت اٹلی و چین آمبار مسر تو مچ آ ملک اٹ لاک ڈاﺅن کرینہ ولے نن دہن کننگ کپنہ، او پک کرے کہ کورونا تون کل آن بھلا ویل غریب آتا ئِ۔ ننے کورونا تون قوم انا وڑ اٹ مون تروئی ءِ، او اومیت کینہ کہ نن داڑان پیش تمنہ۔ او پارینے کہ اگہ اُلس پام کتو تو نسخان کل انا مریک۔ اومیت ءِ کہ اُلس اُست جم کپک۔ وزیراعظم پارینے کہ اگہ پاکستان اٹ اٹلی آمبار حالیت آک مسر تو ای مچ آ ملک اٹ لاک ڈاو ¿ن خلکٹہ ولے دہن ممکن اف، وخت اس کہ چین اٹ لاک ڈاﺅن نا بابت اٹ وزیراعظم پاریسس کہ او دنیا نا ارٹمیکو بھلا زرگزران ئِ۔ ولے نن دہن کننگ کپنہ۔ وزیراعظم پارینے کہ ہراوڑ چین کورونا آ کنٹرول کرے ہندن انشاءاللہ نن ہم کورونا غا کنٹرول کینہ۔ کورونا وائرس آن زیات خلیس ہڑ دھڑ نا ئِ۔ وخت اس کہ اُلس ءِ کُن خور گڑا مچ کننگ نا گرج اف، ملک اٹ کُن خور نا گڑاتا ہچ ءُ کمتی اس اف۔