الس کمک کتو تو لاک ڈاﺅن اٹ دے پہ دے آ سختی کرسا کانہ، جام کمال خان

نصیر آباد (خ ن ) وزیر اعلیٰ بلوچستان جام کمال خان پارینے کہ الس کمک کتو تو لاک ڈاﺅن اٹ دے پہ دے آ سختی کرسا کانہ، دا ہیت آتے او نصیر آباد اٹ کرے۔ او اسہ دے ئی دورہ غا نصیر آباد ڈویژن ءِ سر مس، کمشنر نصیر آباد ڈویژن عابد سلیم قریشی اودے بخیر کرے وزیر اعلیٰ بلوچستان جام کمال خان جعفر آباد اٹ ترکش کالونی ٹی جوڑ مروک آ آئیسولیشن وارڈ نا جاچ ءِ ہلک، ڈی ایچ او جعفر آباد ڈاکٹر قدرت اللہ جمالی اودے سینٹر تا بابت جوان معلومداری تس، اوکان گڈ وزیر اعلیٰ جام کمال خان ڈیرہ مراد جمالی مڈ وائفری اسکول اٹ جوڑ مروک آ آئیسولیشن سینٹر و سول ہسپتال اٹ جوڑ مروک آ آئیسولیشن وارڈ نا جاچ ءِ ہلک، کمشنر نصیر آباد عابد سلیم قریشی وزیر اعلیٰ جام کمال خان ءِ کورونا وائرس نا خلیس نا بابت جوڑ کروک آ آئیسولیشن وارڈز و سینٹر تا بابت جوان معلومداری تس، او وخت آ محنت و افرادی قوت نا صوبائی سلاہکار حاجی محمد خان لہڑی،بی ڈی اے نا سیکر ٹری پارلیمانی میر سکندر علی عمرانی ،کمشنر نصیرآباد عابد سلیم قریشی ،ڈپٹی کمشنر حافظ محمد قاسم کاکڑ، ڈویژنل ڈائریکٹر ہیلتھ ڈاکٹر حماد اللہ زہری ،ڈی ایچ او ڈاکٹر عبدالمنان لاکٹی ،ایم ایس ڈاکٹر ایاز جمالی تون اوار کیہی افسرک ساڑی ئسر، وزیر اعلیٰ بلوچستان جام کمال خان نصیر آباد و جعفر آباد اٹ سد بسترہ نا آئیسو لیشن سینٹر نا جوڑ کننگ نا اُست خواہی نا درشانی ءِ کرے، وخت اس کہ میڈیا و افسر تتون ہیت وگپ کرسا وزیر اعلیٰ بلوچستان جام کمال خان پارینے کہ نصیر آباد ڈویژن اٹ ہچ ءُ زہمی ءُ زائر اس اف، آئیسو لیشن سینٹر ہندا سوب آن جوڑ کننگ انگ ءِ کہ خدا نخواستہ اگہ کورونا وائرس تالان مریک تو اودے داڑے شفٹ کننگے ننے دا جاگہ نا اُلس نا خیال ارے، ہرافتیکن گام گیج آتے پک کننگ انگ ئِ۔ بلوچستان نا کل ضلع غاتیٹی آئیسولیشن سینٹر و روم جوڑ کننگ انگ ئِ۔ کوئٹہ، تفتان، چمن تون اوار بلوچستان نا کل ضلع غاتیٹی ہر وڑاٹ ٹیسٹنگ نا کاریم تے پورو کننگ انگ ئِ، پنچ ہزار آن زیات زائر تے نن 2 دے آن ءِ اوفتا خیالداری ءِ کننگ اٹی اُن، ہرا زائر تے اوفتا صوبہ غاتا حوالہ ٹی کرین تو ہمو زائر تا کل حالیت ءِ صوبہ غاتے ایتنہ، مچ آ صوبہ ٹی ایلو ملک آتیان بروک آ بندغ آک خدا ءِ منر تینا کمرہ غاتیٹی مریر، تینا اُراتیان اسل پیش تمپس۔ 9 لکھ پاکستانی تدوک آ 20 دے اٹ جتا جتا ملک آتیان پاکستان آ بسنو، برطانیہ، امریکہ و ایلو ملک آتیان بروک آ بندغ آتیٹی وائرس تالان مننگ اٹی ئِ، اگہ کس اس دہن ءُ بندغ اس خنانے تو اودے پیش تمننگ آن تورے او ڈاکٹر اسے سہی کے، اخس کہ نن پام کینہ ہموخس وائرس کم تالان مریک۔