دنیا نا ایلو ایئرپورٹ آتیا گٹ پاکستانی تا باندات کاریم کننگ اٹی اُن، دفترخارجہ

اسلام آباد(آن لائن)ترجمان دفتر خارجہ پارینے کہ دنیا نا جتا جتا ائیرپورٹ آتیا گٹ انگا پاکستانی تا بابت کاریم کننگ اٹی اُن، تہوئی اڈہ غاتیٹی گٹ انگا54 شاری تے ملائیشیا ٹی ولدا انٹری کننگانے۔ میڈیا رپورٹس نا رداٹ ترجمان عائشہ فاروقی پارینے کہ دفتر خارجہ جتا جتا ملک آتیٹی ساڑی تینا مشن تیٹی رپورٹ ہلنگ اٹی ئِ۔ کوالالمپور اٹ پاکستانی سفارت خانہ نا رداٹ ائیرپورٹ آ گٹ 54 پاکستانی تے ریسکیو کننگانے۔ عائشہ فاروقی پارینے کہ کل مسافر ےس امیگریشن مسنے، ولے ائیر لائن بورڈنگ آن نمن مسوسس۔ کمک کننگ آ ملائیشیا نا منتوار اُن۔ او پارینے کہ تھائی لینڈ اٹ پاکستانی سفیر نا رداٹ بینکاک اٹ گٹ 50 پاکستانی تے ولدا انٹری نا کوشست کننگ انگ ئِ۔ یات سلے کہ بینکاک و دوحہ ایئرپورٹ آ پاکستانی گٹ مسنو۔ قطر کمامدار آک لندن آن دوحہ نا کسر اٹ بروک آ پاکستانی تا پاسپورٹ آتے ہلکنو۔ محصورین پاکستانی حکومت آن کمک نا خواست کرینو۔ پیشن ملک آتیٹی گٹ مروک آ پاکستانی تیٹی انٹرنیشنل ہاکی سٹار افشاں نورین ہم اوار ئِ۔ حوال نا رداٹ بینکاک و دوحہ ٹی اختہ انگا پاکستانی تے کشنگ کن حکومت پی آئی اے کمامدار آتتون حال احوال کرسا خاص ءُ آپریشن اسے نا بابت اٹ جم حوال بٹنگانے۔